HARI DUA, 14 JUN 2022

KUCHING: Udah dua taun betapi enggau pandemik COVID-19, diatu pengerami Gawai Dayak Renggat Nengeri Sarawak 2022 deka disambut 10 hari berunggu kena 17 nyentuk 26 Jun tu.

Sapit Menteri ba Opis Premier Sarawak (Orang Gawa, Imigresen enggau Matau Projek), Dato Gerawat Gala madah, pengerami nya deka dipungkal enggau pengawa ngatur Bazar Gawai Dayak ti digaga ba laman Balai Mensia Mayuh Kaunsil Mengeri Kuching Selatan (MBKS).

“Kitai melabaka 200 kedai nyengkaum 100 kedai bejual pemakai enda ‘halal’, 50 kedai ‘halal’ enggau 50 agi kedai alai bejual asil pengelandik jari bisi ba Bazar Gawai Dayak tu,” pia ku iya madah maya aum media di Kuching, kena Hari Satu.

Nambahka jaku iya, Dato Gerawat madah, mayuh bengkah program panggau mantaika main asal bisi diatur baka Malam Main Asal Raban Bansa Dayak-Orang Ulu, Iban enggau Bidayuh, ‘live-band’ sereta pekit Kumang enggau Keling.

Kelimpah ari nya, Pengerami Makai Lemai Gawai Dayak ke diatur kena 25 Jun tu deka digulu Tuai Megai Menua (TYT) Nengeri Sarawak, Tun Pehin Sri Abdul Taib Mahmud enggau bini, Toh Puan Datuk Patinggi Raghad Kurdi Taib.

Nambahka nya, Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg enggau bini, Puan Sri Amar Juma’ani Tun Tuanku Bujang bela disadang datai ngerichah pengerami. -UKAS