HARI DUA, 14 JUN 2022
KUCHING: Festival Muzik Hutan Hujan Dunia (RWMF) nerima timbal ke manah alai 7,000 iti tikit udah mujur dijual naka ke diatu.
Menteri Dagang Temuai, Industri Kreatif Enggau Seni Pemerindang Sarawak, Dato Sri Abdul Karim Rahman Hamzah madah, pengerami nya diperambu ulih nyual 12,000 iti tikit.
“RWMF serak tu deka diatur 17 ngagai 19 Jun 2022 lalu disadang ulih matak 12,000 iku temuai baikka ari menua tu empu tauka menua bukai.
“Naka ke diatu, 7,000 iti tikit udah dijual lalu tu ngelui ari ke dipelabaka kitai,” pia ku iya maya aum media di Kuching, kena Hari Dua.
Dulu ari nya, Dato Sri Abdul Karim ke mega Menteri Raban Nembiak, Lumba Enggau Pemansang Orang Dagang Sarawak bejadika bup RWMF ke begela ‘The Rainforest World Music Festival – a Journey Of 25 Years’.
Ku iya, bup nya ngundan cherita pejalai pengerami enggau raban pemusik menua tu ke bisi ngambi bagi ba pengerami nya.
“Bup tu bekunsika pejalai RWMF ari keterubah diatur suba ke semina digulu 300 iku temuai aja ba Kampung Budaya Sarawak.
“Ditu, kitai dibai macha nama ke nyadi tiap taun maya RWMF diatur nyentuk iya nyadi pengerami ti balat dikerindu serata dunya,” ku iya madah baru.-EDISI UKAS
