HARI DUA, 21 JUN 2022
KUCHING: Gawai Bazaar Renggat Nengeri Sarawak 2022 meri awak ngagai orang dagang mit ari raban bansa Dayak nambahka penatai pemisi sida seraya mandangka produk ke dijual sida ngagai mensia mayuh.
Sapit Premier Sarawak, Datuk Amar Douglas Uggah Embas madah, iya temegah ati meda timbal ke manah mensia mayuh ngagai program nya ke diatur berengkah 17 Jun tu tadi nyentuk 26 Jun ke deka datai.
“Program baka tu meri awak ngagai sida ke bedagang mit mandangka barang ke dijual sida ngagai mensia mayuh.
“Tu mega nyadi awak ngagai sida nambahka penatai pemisi ruang bilik,” pia ku iya.
Iya bejaku munyi nya maya dirandau media udah bejadika Gawai Bazaar Renggat Nengeri Sarawak 2022 di Balai Mensia Mayuh Kaunsil Mengeri Kuching Selatan, kena Hari Satu.
Dulu ari nya, Datuk Amar Douglas enggau temuai dipebasa ke bukai bisi bejalai ngelawa kedai makai enggau ai irup kelimpah ngena awak nya berandau enggau sida ke bisi bejual ba program nya.
Bisi 129 iku orang bejual pemakai enggau ai irup kelimpah asil pengelandik jari bisi ngambi bagi ba program nya.
Bela datai maya nya, Menteri ba Opis Premier Sarawak, Datuk John Sikie Tayai enggau bini Datin Melia Gelen; Sapit Menteri ba Opis Premier Sarawak (Orang Gawa, Imigresen enggau Matau Projek ), Dato Gerawat Gala enggau bini Datin Easter Mujan Balan; Sapit Menteri Utiliti enggau Telekomunikasyen I, Datuk Liwan Lagang enggau bini Datin Rosnie Bilang sereta bala ke bukai. -EDISI UKAS
