HARI DUA, 21 JUN 2022
KUCHING: Gerempung Orang Betanam Betupi Menua (NAFAS), Kaunsil Penyerakup enggau Pengintu Tanah Sarawak (SALCRA) enggau Gerempung Orang Betanam Betupi Nengeri Sarawak (PPNS) deka besaup ngemansangka sektor betanam betupi ba nengeri tu.
Chairman Kaban Komiti Direktor NAFAS, Dato’ Zamri Yaakob madah, pengawa nya ngembuan tuju deka ngetanka pemanah pengelikun barang pemakai maya hari tu.
“Sarawak bisi umai nanam padi, NAFAS mansutka sum padi lalu kitai deka besaup enggau SALCRA ke bisi kilang sum.
“Semua raban kitai di NAFAS nyauka bisi sejuta nengah PPNS enggau 279 Gerempung Orang Betanam Betupi Menua (PPK) alai kitai deka besaup. NAFAS deka nyadi tuai ngaduka tuju tu,” pia ku iya madah ngagai media.
Iya bejaku munyi nya udah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Wisma Bapa Malaysia, Kuching, kena Hari Satu.
Nambahka jaku iya, Dato’ Zamri madah, pengawa nanam jagung enggau nyiur bela deka dikemeratka nyerumba peminta di Sarawak.
“Kitai deka ngiga endur ke engkeman di Sarawak begulai enggau PPNS. Kami bisi merambu deka muka kebun bedandang besai ngena tanah Hak Adat Bumiputera (NCR) ba tuju nya.
“Premier Sarawak mega madahka diri besetuju bendar enggau perambu nya alai iya madah Perintah Sarawak deka meri sukung,” ku iya madah baru.
Penemuai basa nya betuaika Menteri Betanam Betupi Moden enggau Pemansang Kandang Menua Sarawak, Dato Sri Dr Stephen Rundi Utom. -EDISI UKAS
