Perintah Sarawak Ngungkupka RM5 Juta Dikena Ngaga Palan Mansik Orkid

HARI DUA, 28 JUN 2022

KUCHING: Perintah Sarawak udah ngungkupka belanja RM5 juta ngagai Opis Kampung Sarawak dikena ngaga model Taman Orkid.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Taman Orkid nya deka digagaka nyadi palan mansik dikena Opis Kampung Sarawak enggau Palan Bidoversiti Sarawak.

Iya madah, orkid ke bisi di Borneo nyelai lalu ulih diterenak tauka dikawin nyadi orkid hibrid ti tau dieskport.

“Taman orkid tu enda baka taman orkid ke suah dipeda kitai laban iya bela digaga ketegal deka mansik orkid.

“Orkid diatu mega ulih dikawin nyadi orkid hibrid.

“Taja pia kitai mesti ngaga pansik dulu lalu ketegal nya aku ngungkupka belanja RM5 juta dikena ngaga kebun mit ke disikap enggau kereban digital ke ulih dikena mansik orkid,” pia ku iya madah.

Iya bejaku munyi nya maya bejadika pengerami nyambut Hari Kampung Sedunya Renggat Nengeri Sarawak 2022 ba Industrial Forest Research Centre (IRFC), Jalai Puncak Borneo, Kuching, kena Hari Dua.

Datuk Patinggi Tan Sri Abang Zohari maya nya mega madahka Taman Orkid nya nyangka deka digaga di Semenggoh.

Nambahka nya, iya madahka diri andal Sarawak ulih nyadi menua nyual bungai orkid ngagai menua bukai baka ngagai menua Belanda enggau China.

Sama bela datai maya nya, Duta Besai Jepun ke Malaysia, Takahashi Katsuhiko, Konsul Jenderal Republik Indonesia di Kuching, Bapak Raden Sigit Witjaksono, Sapit Menteri ba Opis Preimer Sarawak (Integriti Enggau Ombudsman), Dato Murshid Diraja Dr. Juanda Jaya enggau Direktor Opis Kampung Sarawak, Datu Hamden Mohammad. -EDISI UKAS

add comment