HARI TIGA, 29 JUN 2022

KUCHING: Songket Sarawak udah dituku Gerempung Pelajar, Saintifik enggau Main Asal Pertubuhan Bangsa Bersatu (UNESCO) nyadi ‘Intangible Cultural Heritage’ (ICH) ti besai reti ngagai pekara rama enggau ekonomi.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemutus nya deka mai pemaik ngagai dagang temuai main asal di nengeri tu ti ulih ngelakuka pesaka main asal, seni, kraft enggau adat lama.

“Songket Sarawak tau bendar mai pemaik ke bukai ba pengawa pun pemansang pesaka main asal (ICHLinks) ari mensia mayuh global.

“Pemansang ICH di Sarawak udah nya ulih nyaup mai penatai ngagai orang dagang menua tu lalu nyungkakka pengerembai ekonomi Sarawak,” pia ku iya ba pengerami ‘Anugerah ICH kemanusiaan dan Komuniti’ di Kunsil Nengeri (DUN) Sarawak ditu, kena Hari Dua.

• 

Nambahka jaku iya, Datuk Patinggi Tan Sri Abang Zohari madah, songket tauka kereban asal baka Pua Kumbu ulih digagaka nyadi siti industri.

“Dikena ngaduka pengawa tu, kitai ulih ngaga Palan Songket di serata Sarawak ti nyediaka latih, pelajar enggau ngasilka produk.

“Udah nya, Palan Songket tau digaga nyadi koperasi ke nyaup nyual Songket Sarawak.

“Ari tu rayat ulih ngemansangka pengawa sida ba produk songket,” ku iya madah.

• 

Ba pengerami nya, Premier Sarawak enggau bini, Puan Sri Datuk Amar Juma’ani Tun Tuanku Bujang enggau Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah nerima Anugerah ICH Kemanusiaan bepun ari pengeransing ngereja pengawa nyaga pesaka enggau main asal Sarawak.

Kelimpah ari nya, 22 iku nerima Anugerah ICH Komuniti (Sandang Warisan).

Sama bela datai ba pengerami nya, Speaker DUN Sarawak, Tan Sri Datuk Amar Mohamad Asfia Awang Nassar enggau bini, Dato Fatimah Mohd Iskandar, bini Menteri Dagang Temuai, Industri Kreatif enggau Seni Pemerindang, Datin Zuraini Abdul Jabbar, Tuai Direktor Palan Penerang enggau Kaul Entarabansa ICH di Rantau Asia Pasifik ari baruh UNESCO (ICHCAP) Kim Ji Sung enggau Presiden Gerempung Pengemeran Seni enggau Main Asal Malaysia (MACPA) Marzuki Tambi.-EDISI UKAS