HARI EMPAT, 30 JUN 2022
KUCHING: Opis Menteri Raban Nembiak, Lumba enggau Pemansang Orang Dagang Sarawak udah ngelanggur ngatur 120 program pemansang raban nembiak, lumba enggau pengawa dagang ba serata nengeri nyengkaum menua pesisir enggau ulu sungai, taun tu.
Menteri ba opis menteri nya, Dato Sri Abdul Karim Rahman Hamzah madah, opis menteri iya empai lama tu tadi udah ngatur Program MYSED Go Rural @ Long Singut kena 24 enggau 25 Jun ti mujur matak penatai 100 iku raban nembiak enggau mensia mayuh ke bukai ba Long Singut, Kapit.
Iya madah, taja Long Singut jauh, semilan jam nengah darat enggau sungai tang program dua hari berunggu nya mujur bendar diatur.
“Aku endang gaga ati laban program baka tu mai reti ke besai sereta mandangka pengeransing opis menteri bejalaika pengawa.
“Aku mega temegah ati enggau pemujur ke udah ditempa ari program tu ke mega siti ari program ke dilanggur MYSED Calendar of Programs (COP) 2022,” pia ku iya madah maya Pengerami Ramah Tamah Raya Gawai 2022 ke diatur Opis Menteri Raban Nembiak, Lumba enggau Pemansang Orang Dagang ditu, kena lemai Hari Tiga.
Sama bela datai Sapit Menteri Raban Nembiak, Lumba enggau Pemansang Orang Dagang Sarawak, (Pemansang Raban Nembiak enggau Lumba), Dato Gerald Rentap Jabu, Sapit Menteri Raban Nembiak, Lumba enggau Pemansang Orang Dagang Sarawak (Pemansang Orang Dagang), Dr Ripin Lamat, Sapit Menteri Dagang Temuai, Industri Kreatif enggau Seni Pemerindang (Industri Kreatif enggau Seni Pemerindang), Datuk Snowdan Lawan sereta temuai ke bukai.
Nambahka nya, Dato Sri Abdul Karim mega madahka pengawa nyikap SUKMA 2022 udah diatur enggau mujur, nitihka perambu enggau juluk ati ke udah diletak.
Ku iya, Sarawak bisi 810 atlit ke deka ngambi bagi ba SUKMA lalu sekeda ari program pemansang lumba ke diatur dikena nyikap sida ngambi bagi ba lumba nya nyengkaum Sarawak Warrior Camp ke diatur kena 23 nyentuk 29 Jun tu tadi enggau Kem Kontinjen SUKMA XX MSN 2022 ti deka diatur kena 12 nyentuk 15 September 2022.
“Aku andal ari pengawa tu kelimpah pemujur atlit kitai ba Lumba SEA sebedau tu, ulih mai Sarawak ba penduduk ke manah maya SUKMA 2022 ti diatur kena 16 ngagai 24 September taun tu.
“Aku temegah ati meda pemujur opis menteri, Ejensi Lumba Sarawak enggau Kaunsil Lumba Nengeri Sarawak ngatur program baikka ba renggat entarabansa, menua, nengeri tauka renggat pelilih menua .
“Pengeransing enggau pemujur tu endang mandangka pemeras bejalaika pengawa ke nyadi pelasar nempa raban nembiak betikas dunya, lumba ungkup semua enggau dagang nyulut lalu deka mai Sarawak nyadi ‘sports powerhouse’ manggai taun 2030,” ku iya madah baru.-EDISI UKAS
