HARI LIMA, 8 JULAI 2022

KUCHING: Serakup Kelab Media Malaysia (GKMM) deka nandu program bejalai sida ke Sarawak bulan ke deka datai betemu enggau raban media ke berejister ba kelab enggau gerempung di nengeri tu.

Presiden serakup, Fauzi Ishak madah, Sarawak nyadi nengeri kedua deka dilawa Komiti Besai GKMM udah Sabah sebedau ditangkan nengeri ke bukai udah tu ila.

“Pengawa GKMM tu nyerumba tuju ke udah digaga maya Program Pemukiman Media Se-Malaysia di Pulau Langkawi, Kedah kena 28 Mac tu tadi ti ngempung semua kelab media di serata menua tu.

“Inisiatif penumbuh GKMM tu digaga ari ngempung semua 14 kelab enggau gerempung media di 14 nengeri lalu nyadi serakup media ke pemadu besai kala ditumbuhka di Malaysia enggau penyampau lebih 5,000 iku raban,” pia ku iya madah nengah penerang media, kena Hari Empat.

Dulu ari nya, Sapit Sekretari GKMM, Jacqueline Radoi udah nemuai ngagai Sapit Menteri Pekara Korporat, Pemadah enggau UKAS, Datuk Abdullah Saidol dikena nerangka program ke deka digaga GKMM di Sarawak ba opis iya, kena Hari Empat.

Kena 27 ngagai 29 Jun tu tadi, GKMM bisi ngatur pengawa betemu enggau Gerempung Pemberita Sabah (SJA), nerangka tuju penumbuh GKMM lalu bekunsika langgur dudi hari dikena nyungkakka program kelab enggau gerempung media nengeri.

Maya program di Sarawak ila, GKMM dilanggur deka betemu enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg, pemesai politik enggau kompeni.

Kelimpah ari nya, sida mega merambu deka nemuai ngagai beberapa bengkah endur ke diatur begulai enggau Persekutuan Persatuan-Persatuan Wartawan Sarawak (FSJA). -EDISI UKAS