Premier Sarawak Nemuai Meri Basa Ngagai Menteri Besai Singapura

HARI LIMA, 8 JULAI 2022

SINGAPURA: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nemuai meri basa ngagai Menteri Besai Singapura, Lee Hsien Loong di istana di Orchard Road, Singapura kena Hari Empat.

Penemuai basa tu dikena berandauka penemu bekaul enggau atur pengawa ‘sovereign wealth fund’ Singapura kelimpah ngerembaika kaul ekonomi entara Singapura enggau Sarawak.

Kelimpah ari nya, penemuai basa sepengelama 30 minit tu, Premier Sarawak enggau Menteri Besai Singapura mega berandauka pekara ke pemaik dua buah menua sereta isu ke bisi nyadi maya hari tu.

Bela nyempulang Premier Sarawak iya nya Sapit Premier, Datuk Amar Douglas Uggah Embas, Datuk Amar Awang Tengah Ali Hasan enggau Dato Sri Prof. Dr Sim Kui Hian sereta Pesuruhjaya Tinggi Malaysia Ke Singapura, Dato’ Dr. Azfar Mohamad Mustafar.

Dulu ari nya, Premier Sarawak enggau bala bukai nemuai meri basa ngagai Sapit Menteri Besai enggau Menteri Wang Singapura, Lawrence Wong.

Udah nya lalu ditangkan enggau pengawa nemuai meri basa ngagai Menteri Kanan enggau Menteri Pengatur Pengelikun Menua Singapura, Teo Chee Hean.

Mua ke lemai, sida lalu neruska pengawa ngabas Temasek Holdings Private Limited lalu diberi licha bekaul enggau atur pengawa beranakka puku domestik Perintah Singapura. -EDISI UKAS

add comment