HARI SATU, 11 JULAI 2022

KANOWIT: Kaban Kunsil Nengeri (ADUN) Ngemah, Anyi Jana numbuhka pelin setaun ngagai tiga taun enggau sepenggal (2021-2025) dikena ngaduka pemansang ba sitak DUN pegai iya.

Dikena ngemujurka pengawa nya, iya udah ngatur penemuai basa ngagai ejensi perintah besai enggau perintah Sarawak ba tuju ngempung penerang ke pemadu baru bekaul enggau gaya ke nyadi di DUN Ngemah.

Iya madah, ari penemuai basa nya, beberapa bengkah pekara ke suah dibantaika rayat dia deka diputar nyengkaum numbuhka pemansang infrastuktur enggau arus penyambung.

Bejaku maya Pengerami Bejadika Tanju enggau Ngiling Bidai di Rumah Madang, Nanga Buan, Kanowit, empai lama tu tadi, iya enggau nya minta rayat dia nyukung pegai perintah Gabungan Parti Sarawak (GPS) ti udah ngayanka diri ransing mai pemansang lebih agi di menua pesisir.

Bekaul enggau Projek Tanju Rumah Madang, iya mega madahka projek nya digaga nengah Projek Mit Menua Pesisir (MRP) enggau Projek Ngemanahka Rumah Seranta Sarawak (PPRMS).

Ku iya, ari bajet MRP Renggat 1, iya udah ngungkupka belanja RM1.1 juta ngagai 86 penerima ke nyengkaum diberi ngagai Komiti Pemansang enggau Pengelikun Genturung Pendiau (JKKK), Gerempung Apai Indai enggau Pengajar (PIBG) sereta gerempung ke bukai.

Kelimpah ari nya, maya pengerami nya mega, Anyi madahka diri deka berundingka peminta Tuai Rumah Madang ngaduka ruai rumah panjai sida.-EDISI UKAS