HARI SATU, 18 JULAI 2022

LUNDU: ‘Friend Of River’ sebagi ari pelasar alai numbuhka ulah besaup mensia mayuh enggau Opis Sungai-Sungai Sarawak (LSS).

Sapit Menteri Pengangkut (Sungai enggau Tasik) Sarawak, Dato Henry Harry Jinep madah, ‘Friend Of River’ mega beguna nyadika ‘mata enggau pending’ ngagai ejensi perintah ngambika ulih ngenataika ripot bekaul pengelikun engggau pemeresi sungai ba menua sida.

Iya madah, program bekaul pengelikun enggau pemeresi sungai beguna dikena mai mensia mayuh lebih agi ngagai sida ti bekenaka perengka pengangkut sungai.

Nya alai, ku iya, perintah ngemeratka pekara pengelikun lebih agi maya bekeneka perengka pengangkut sungai maya musim hari besai.

“Lalu pia mega, sehari tu, bisi 132 iku bala mayuh ari menua Selampit udah ngerejister nyadi ‘Friend Of River’,” ku iya madah.

Iya bejaku munyi nya maya pengawa nutup Program Bekaul Pengelikun enggau Pemeresi Sungai ba Kampung Selampit, kena Hari Enam tu tadi.

Dulu ari nya, iya enggau bala bukai merau ngagai palan program lalu ngelepaska 15,000 iku anak ikan ngagai sungai menua nya.

Sama bela datai iya nya Chairman LSS, Dr. Murni Suhaili, Pemangku Controller LSS, Lt.Kol. Ding Tiew Wong (Pinchin), Pegawai Pelilih Lundu, Gustian Durani sereta bala bukai.-EDISI UKAS