HARI SATU, 18 JULAI 2022

LIMBANG: Rayat ba Parlimen Limbang dipinta majakka sukung ngagai Gabungan Parti Sarawak (GPS) ba Pengawa Bepilih Besai Ke-15 (PRU15) ke deka datai.

Sapit Menteri Pemansang Menua Pesisir Malaysia, Datuk Hasbi Habibollah madah, pengawa ke dikereja GPS ngelama tu berupai diterima rayat ti ulih dipeda ari pemujur maya Pengawa Bepilih Besai Nengeri Ke-12 (PRN-12) Sarawak ke menang ba 76 ari 82 iti penuduk.

Iya madah, tu mandangka rayat begunaka perintah ti kering sereta tegap mai pemansang ngagai Sarawak.

“Rayat deka dipegai perintah tegap ngambika menua enggau ekonomi likun lalu orang menua bukai mega enda kakang beranakka puku ba menua kitai,” pia ku iya madah ba Program Pemesai Begulai Enggau Rayat beserimbai pengawa nyuaka geran ari Kaban Parlimen Limbang ke diatur ba Dewan Kampung Bunga Raya ditu, empai lama tu tadi.

Maya nya, bisi 56 iti Komiti Pemansang enggau Pengelikun Genturung Pendiau (JKKK) raban bansa China, Bisaya, Lun Bawang, Kelabit enggau Penan nerima geran RM350,000 ari Perintah Besai.

Geran ke sebaka bela diterima tiga buah gerempung, dua ejensi perintah enggau sebuah gerija.

Sebedau tu, geran ke sebaka disuaka ngagai 53 JKKK ari genturung pendiau Melayu enggau Kedayan bulan April tu tadi lalu pengawa nyuaka geran ngagai 57 JKKK bagi genturung pendiau Iban udah diatur maya Bazaar Gawai Dayak 2022 di Pasar Medamit.

Ba pekara bekaul, iya ke mega Kaban Parlimen Limbang madahka Opis Menteri Pemansang Menua Pesisir (KPLB) udah ngemendarka agih belanja RM4.6 juta dikena ngaga Jematan Sungai Enseriban enggau Jematan Sungai Kemena ti Medamit.

Iya maya bela madahka KPLB diatu benung merambu deka ngatur karnival orang dagang ba pelilih Limbang iya nya Mini Karnival Usahawan Desa (KUB) kena 26 ngagai 28 Ogos tu di Limbang. -EDISI UKAS