HARI TIGA, 20 JULAI 2022
KUCHING: Perintah Sarawak enda bechiping ba pengawa ngemunaska penyalah makai suap ba orang kereja perintah di nengeri tu.
Sapit Menteri ba Opis Premier Sarawak (Integriti enggau Ombudsman), Dato Murshid Diraja Dr. Juanda Jaya madah, Perintah Sarawak semampai ngatur pengawa ke tau nyungkakka tikas integriti ba semua sida ke gawa perintah.
Ku iya, pekara tu deka nempa pengulih sida bejalaika pengawa ke manah ngagai rayat.
“Tu nyengkaum ngatur Program Pegawai Integriti Bertauliah (CeIO) ti ngembuan tuju nempa modal mensia ba sektor kereja perintah ti profesional, ngemeran ulah integriti sereta ulah bejalaika pengawa diri enggau manah.
“Kebuah pia, servis ke disediaka perintah semampai dipeda enda manah ketegal penemu madahka pengurang servis nya endang bepun ari orang kereja perintah empu,” pia ku iya madah.
Iya bejaku munyi nya maya Pengerami Nutup Seminar Kelestarian Integriti (SKI) Program Pegawai Integriti Bertauliah (CeIO) Sektor Awam Siri 30 Bilangan 2 Tahun 2022 ba Palan Konvensyen Borneo (BCCK) Kuching, kena Hari Dua.
Program nya diatur begulai Akademi Pencegahan Rasuah Malaysia (MACA) enggau Unit Integriti enggau Ombudsman Sarawak (UNIONS), Opis Premier Nengeri Sarawak lalu digulu 76 iku penyereta belabuh 23 Mei nyentuk 19 Julai 2022.
Nambahka jaku iya, Dato Dr Juanda madahka diri ngarapka program nya deka nempa penyereta nyadi pegawai perintah ti ngembuan integriti ke tinggi ti matau sereta ngemunaska isu bekaul integriti, makai suah tauka isu ngelaban atur ba opis.
“Sida deka nyadi ejen ngubah tauka nyaup nyungkak pemanah gaya gawa ti mekuhka ulah ngenggaika pengawa makai suap,” ku iya madah baru.
Sama bela datai ba seminar tu iya nya Direktor UNIONS, Adana Jed, Ex Tuai Direktor Governans, Integriti enggau Ngemunas Penyalah Makai Suap, Abu Kassim Mohamed enggau Sapit Tuai Opis Nagang Penyalah Makai Suap Malaysia (SPRM) Dato’ Junipah Wandi. – EDISI UKAS
