Pesta Ujud Mantai Program Pesaka, Seni Enggau Main Asal

HARI SATU, 25 JULAI 2022

SIMUNJAN: Pesta Ujud sebagi ari pengerami baru ke tau bendar matak penatai temuai ke Simunjan tauka Sarawak.

Menteri Dagang Temuai, Seni enggau Main Asal Malaysia, Dato Sri Nancy Shukri madah, pengerami nya bela ngayanka program ti mantaika program bekaul pesaka, main asal enggau seni ba menua nya.

Ku iya ti mega Kaban Parlimen Batang Sadong, iya andal Pesta Ujud nyadi siti ‘trademark’ peranak Kampung Kelka di Simunjan ti tau mega ngerandang awak nambahka penatai pemisi sida.

“Pandemik COVID-19 udah ngajar kitai baka ni ngadu manah tauka belajar chara baru matak penatai temuai baikka ari menua tu empu tauka temuai ari menua bukai,” pia ku iya.

Iya bejaku munyi nya maya bejadika Pengerami Nutup Pesta Ujud 2022 Renggat Ke-2 di Balai Mensia Mayuh Kampung Kelka, kena Hari Minggu tu tadi.

Bela datai maya nya Kaban Kunsil Nengeri (ADUN) Simunjan, Awla Dris, Pemangku Pegawai Pelilih Simunjan, Zainap Halip, Sekretari Politik ngagai Dato Sri Nancy, Mohammad Kamaluddin Mohammad Effendie enggau Chairman Komiti Pesta Ujud 2022, Awang Ismail Awang Wahab.

Ba pengerami nya mega, Awla madahka Pesta Ujud 2022 diatur berengkah 16 Julai tu tadi beserimbai nyambut 59 taun Sarawak Merdeka.

Iya madah, macham program bisi diatur nyerumba pengerami nya. -EDISI UKAS

add comment