Saup Semua Beguna Dikena Napi Penyalah Bekenaka Dadah

HARI SATU, 25 JULAI 2022

BAU: Saup ari semua beguna dikena mutarka penyalah bekenaka dadah ba nengeri tu.

Sapit Menteri Pengangkut Sarawak, Dato Henry Harry Jinep madah, penanggul nya nyadi penanggul ke enda temu kemaya punas tang ulih diputar nengah saup semua nyengkaum ejensi perintah, One Stop Committee (OSC), gerempung ukai dikuasa perintah (NGO) enggau mensia mayuh ke bukai.

“Ambika banding tuai genturung pendiau tau bepadah ngagai opis tauka ejensi ke bekaul nyema tetemuka ulah nya nyadi ba menua sida,” ku iya madah maya bejadi Pengerami Nutup Program Napi Penyalah Bekenaka Dadah Renggat Zon Jagoi Pelilih Bau di Balai Raya Kampung Serikin ditu, empai lama tu tadi.

Dato Henry ke mega Kaban Kunsil Nengeri (ADUN) Tasik Biru madah, iya udah ngaga perambu ngatur mayuh program lumba ba sitak DUN iya ba tuju mai raban nembiak ngemeranka chara idup bepengerai.

Dulu ari nya bisi 48 iku penyereta ngambi bagi ba program nya ke diatur OSC Mutarka Penanggul Dadah enggau Substance (MIDS) Pelilih Bau. -EDISI UKAS

add comment