UNIFOR Melanja RM10 Juta Dikena Ngaga Baru Gerija Pelilih Sebauh

HARI SATU, 25 JULAI 2022

BINTULU: Perintah Sarawak udah ngungkupka agih belanja RM10 juta dikena nyaup ngaga gerija baru pelilih Sebauh nengah Unit Pekara Pengarap Bukai (UNIFOR).

Bishop Richard Ng madah, kebendar iya belanja ke dikena nembuka projek iya nya RM11.09 juta.

“Belanja projek diberi terus ngagai gerija nengah UNIFOR lalu diberi enggau chara berenggat alai belanja nangkan ke nya bepanggai ba pejalai pengawa ngaga projek.

“Projek tu dipelaba digaga dalam kandang dua taun berengkah 2023 ti disadang tembu taun 2025,” pia ku iya madah maya Pengerami Nyuaka Chek UNIFOR Renggat Keterubah Projek Ngaga Gerija Baru Pelilih Sebauh ba Opis Pelilih Sebauh, empai lama tu tadi.

Chek keterubah nya disuaka Menteri Betanam Betupi Moden enggau Pemansang Kandang Menua ke mega Kaban Kunsil Nengeri (ADUN) Kemena, Dato Sri Dr Stephen Rundi Utom.

Penembu gerija nya ila ulih dikena 1,000 iku sekali.

Sama bela datai ba pengerami nyuaka chek nya, Pegawai Pelilih Sebauh, William Manggoi, Pemangku Direktor Opis Betanam Betupi Sarawak, Dominic Chunggat enggau Pemancha Limin Anai. -EDISI UKAS

add comment