Bayar Tama & Ngena Perengka Guna Muzium Budaya Borneo Berengkah 1 Ogos Tu

HARI DUA, 26 JULAI 2022

KUCHING: Bayar tikit tama enggau bayar ngena perengka guna ba Muzium Budaya Borneo (BCM) deka berengkah dipejalaika 1 Ogos tu.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, Opis Muzium Sarawak (JMS) netapka bayar tikit nya kelimpah bayar ngena perengka guna baka Auditorium, Bilik Mayuh Guna, Palan Pemandang enggau iya ke bukai.

“Taja pia, nembiak 12 taun ke baruh peranak Sarawak enggau ukai peranak Sarawak enda bebayar tang nembiak peranak menua luar bebayar RM20.

“Tikit nembiak Sarawak enggau ukai peranak Sarawak ke beumur 13 ngagai 17 taun enggau nembiak sekula ke bisi kad ID iya nya RM5 lalu tikit tama nembiak ari menua luar iya nya RM25,” pia ku iya ba aum media di Muzium Budaya Borneo Auditorium ditu, kena Hari Satu tu tadi.

Nambahka jaku iya, Dato Sri Abdul Karim madah, tikit orang besai tuai berumur 18 ngagai 60 ke atas iya nya RM10 ba peranak Sarawak, RM20 ukai peranak Sarawak enggau RM50 orang ke datai ari menua bukai.

“Rayat Sarawak ke beumur 61 taun ke atas semina mayar tikit RM5, RM10 ukai peranak Sarawak enggau RM25 bayar ungkup peranak menua bukai.

“Tang OKU ke berejister ti bisi kad ulih tama nadai bebayar,” ku iya nerang baru.

Tikit sida ke datai beraban betubuh lebih 10 iku tauka korporat berejister iya nya RM8 siku ba peranak Sarawak, RM16 siku ukai peranak Sarawak enggau RM40 siku bayar temuai ari menua bukai.

Dato Sri Abdul Karim madah baru, kategori perintah, ejensi enggau gerempung ukai dikuasa perintah (NGO) ke ngena perengka guna BCM deka bebayar tang enda sebaka enggau korporat.

“Pemutus bayar tikit enggau bayar ngena perengka guna tu nyadika belanja dikena ngatur BCM,” ku iya madah.

Tikit ulih dibeli terus tauka ngena e-wallet S Pay Global ba kaunter BCM. -EDISI UKAS

add comment