Dato Sri Lee Enggau Konsul Jeneral Republik Rakyat China Di Kuching Ngabas Pemujur Pejalai Bas Hidrogen

HARI DUA, 26 JULAI 2022

KUCHING: Menteri Pengangkut Sarawak, Dato Sri Lee Kim Shin begulai enggau Konsul Jeneral Republik Rakyat China di Kuching ke baru, Xing Weiping udah ngabas pemujur pejalai bas hidrogen ditu, kena Hari Satu.

Dato Sri Lee maya dirandau madahka tuju pengawa iya nya deka meda kediri pemujur servis bas enda bebayar nya.

“Aku deka meda gaya ke diatu bas hidrogen tu udah ke dikena nyauka tiga taun.

“Naka ke diatu penyauh pejalai bas ngelui 58,000 kilometer lalu empai bisi penanggul,” pia ku iya madah ngagai media.

Kelimpah ari nya, iya mega meri jaku puji ngagai sida ke bekaul ti semampai berandau enggau kilang bas nya di menua China nengah on-line dikena nentuka pengelikun bas nya dikena.

Nangkan ke nya, Xing Weiping maya dirandau madahka iya pechaya perintah Sarawak udah ngaga pemutus ke engkeman ngena sistem perengka pengangkut hidrogen.

“Kami mega deka majak nyukung sereta ngemeratka projek tu seraya ngenegapka agi kaul enggau Opis Menteri Pengangkut Sarawak tauka Perintah Sarawak,” ku iya nerang.-EDISI UKAS

add comment