Dua Projek ‘Sakit’ Di Igan Berengkah Digaga Baru

HARI TIGA, 27 JULAI 2022

IGAN: Dua iti projek ‘sakit’ di Igan udah berengkah digaga baru sepengudah Opis Kereja Raya (JKR) ngatur beberapa bengkah chara.

Sapit Menteri ba Opis Premier Sarawak (Integriti enggau Ombudsman), Dato’ Murshid Diraja Dr Juanda Jaya madah, projek keterubah iya nya jalai ngelawa Pantai Igan ti dilanggur tembu sebedau 31 Ogos taun tu.

Lalu siti agi projek iya nya projek jalai ari simpang Igan ke Sungai Ilas, 11 kilometer pemanjai ti dilanggur tembu dalam kandang enam bulan berengkah ari diatu.

“Aku andal enggau pelin baru ke digaga JKR enggau kontraktor, Projek Rayat tu ulih tembu nitihka langgur,” ku iya madah ngagai Unit Komunikasi Awam Sarawak (UKAS) maya ngabas projek nya di Igan, kena Hari Satu tu tadi.

Dulu ari nya, iya ke mega Kaban Kunsil Nengeri (ADUN) Jemoreng mendingka penerang sentang pejalai projek nya ari kontraktor.

Nangkan ke nya, iya bisi ngabas langgur projek ngaga library JKKK Kampung Sekerang Igan enggau beberapa iti Projek Ngemanah Rumah Rayat Seranta Sarawak (MRP-PPRMS).

Ngalihka lemai, Dato’ Dr Juanda dipebasa bejadika RHB Bank Mobile ATM & CDM Mindah ba Medan Selera Igan.

Ba jaku iya, iya madahka pengawa RHB nya ngemuntangka rayat dia ngaduka pengawa bekaul.

Bank mindah nya bisi ba Oya Square kena Hari Satu, Tiga enggau Hari Lima lalu ngalihka lemai ba Medan Selera Igan.

Hari Dua enggau Hari Empat deka datai ba Balingian. -EDISI UKAS

add comment