KKM Chakah Ngemanah, Ngadu Perengka Guna Enggau Klinik Pengerai Menua Pesisir

HARI TIGA, 27 JULAI 2022

KUALA LUMPUR: Opis Menteri Pengerai Malaysia (KKM) deka majak minta ungkup agih belanja dikena ngadu sereta ngemanahka perengka guna enggau klinik pengerai di menua pesisir.

Menteri Pengerai Malaysia, Khairy Jamaluddin madah, KKM ngarapka klinik ke udah 50 taun ke atas ulih digaga baru kelimpah ngira penyampau tubuh ke ngena klinik nya.

“Servis pengerai ke deka diberi mega bepelasarka agih belanja ke diungkup,” pia ku iya nengah timbal betulis dikena nyaut tanya Kaban Parlimen Baram, Anyi Ngau, kena Hari Satu tadi.

Sebedau nya, Anyi deka nemu perambu ke digaga Menteri Pengerai dikena ngemanahka baru klinik di menua pesisir kelimpah deka nemu pejalai pengawa ngaga Klinik Pengerai Long San naka ke diatu.

Nerang nyemetak, Khairy madah, ba Langgur Pemansang Malaysia Lumpar Ke-12 (RMK-12) Rolling Plan-2 (RP2), Sarawak diungkupka belanja RM1.03 juta dikena ngaduka Klinik Pengerai (KK) Long Jegan, KK Lingga, KK Nanga Mujau enggau KK Tanjung Embang.

“Peminta ba RMK-12 RP3, bisi RM1.34 juta ke diungkup ngagai KK Kedup, KK Long Banga, KK Lusong Laku, KK Banga Ngungun, KK Long Semadoh enggau KK Nyalau ti deka digaga nyema bulih pemendar,” ku iya madah.

Kelimpah ari nya, iya mega madah, Projek Klinik Pengerai Kuarters Long San udah dikemendarka digaga ba taun 2020 enggau belanja RM27.7 juta.

“Projek tu dipelabaka deka ditender bulan November 2022,” pia ku iya madah baru.-EDISI UKAS

add comment