HARI TIGA, 27 JULAI 2022
KUCHING: Perintah Sarawak udah nyain sempekat pemereti ati (MoU) begulai enggau Melexis Technology siti kompeni ke bepalan di Belegium ba tuju nempa ulah besaup bekaul enggau pengawa ngaga Integrated Chip (IC) ti ulih mansutka ‘chip’ di nengeri tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ulah besaup nya beguna bendar ngagai Sarawak nengah pemansang ngaga ‘chip’ ari menua tu empu dudi hari ila.
Iya madah munyi nya maya ngenataika jaku ba pengawa nyain MoU nya di Tessenderlo, Belgium, kena Hari Dua tu tadi.
Kelimpah ari nya, Datuk Patinggi Tan Sri Abang Zohari maya nya bela nerangka pemesai guna pemansang pengelandik dikena nempa pengelantang ngaduka pengawa mansik enggau pemansang (R&D) nengah teknologi ngaga ‘chip’ di Sarawak.
“Ari pengeransing Sarawak lebih agi Kuching ke diatu benung ngaduka Projek Sistem Transit Aliran Autonomi (ART) ti bekenaka hidrogen, R&D endang nyadi batang pemujur pemansang perengka pengangkut baru tu,” ku iya madah.
Ba pengerami nya, Premier Sarawak bela ngemataka pengawa nyain MoU nya entara Opis Menteri Pelajar, Inovasyen enggau Pemansang Pengelandik Sarawak (MEITD) begulai enggau Melexis Technology.
Sempekat nya mungkur ulah besaup ngaga tukuh IC kelimpah pemansang pengelandik ba industri semikonduktor di Sarawak ke nyadi sebagi ari pengeransing perintah nengeri ngemansangka pengelandik enggau tikas inovasyen ditu.
Sama bela datai maya nya, Sapit Premier Sarawak, Datuk Amar Awang Tengah Ali Hasan, Menteri Pelajar, Inovasyen Enggau Pemansang Pengelandik Sarawak, Datuk Roland Sagah Wee Inn Enggau Sapit Opis Menteri Iya, Datuk Francis Harden Hollis enggau Dr Annuar Rapa’ee.
Kelimpah ari nya, Duta Besai Malaysia ke Belgium enggau Luxembourg ke mega Tuai Deligit Malaysia ngagai Kesatuan Eropah (eu), Dato’ Ahmad Rozian Abd Ghani mega bisi maya nya.
Premier Sarawak enggau bala deligit nangkan ke nya bisi nemuai ngagai Port Of Antwerp-Bruges alai maya nya siti agi MoU deka disain bekaul enggau perambu ngaga penyangkai kapal baru di Kuching.
Program nya sebagi ari program keterubah pengawa nemuai bejalaika pengawa Premier Sarawak ke Eropah enggau United Kingdom dalam kandang seminggu. -EDISI UKAS
