Perintah Sarawak Ngaga Pansik Ngaga Penyangkai Kapal Tasik Dalam Ba Tanjung Embang

HARI EMPAT, 28 JULAI 2022

BELGIUM: Perintah Sarawak benung ngaga pansik deka ngaga siti penyangkai kapal tasik dalam ke baru ba selatan Sarawak sepengudah nyain Sempekat Pemereti Ati (MoU) entara Penyangkai Kapal Antwerp-Bruges enggau kompeni peribit ari Sarawak, kena Hari Dua tu tadi.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg datai meda pengawa nyain MoU nya ba langgur ngaga Penyangkai Kapal Tanjung Embang di Nanga Sungai Sarawak semak Kuching nengah kerejasama Penyangkai Kapal Antwerp enggau Hubline Bhd.

Penyangkai Kapal Antwerp, penyangkai kontena entarabansa kedua besai di Eropah enggau ke-14 besai ba dunya lalu Hubline kompeni servis logistik kapal.

Datuk Patinggi Tan Sri Abang Zohari enggau nya madahka diri andal nengah inovasyen pemadu baru deka nentuka penyangkai nya ila deka mujur enggau ungkus ke murah.

Ku iya, pun bulai Julai tu tadi, iya bisi nemuai ke Singapura ngulu program nerang ari sida ke landik bekaul pangka projek nya ngagai sosio-ekonomi ti mungkur pemesai 109 kilometer persegi.

“Enti semua (inovasyen enggau teknologi) udah bisi, orang beranakka puku pan mega bisi pengandal, aku pechaya penyangkai kapal tu ila tau bendar mansang.

“Semua endur ba Semenanjung Tanjung Embang deka dikemansangka kompeni ASSAR iya nya kompeni enggi perintah Sarawak,” ku iya maya pengerami nyain MoU nya.

Nangkan ke nya, Direktor Unit Pengatur Ekonomi Sarawak (EPU), Datu Dr. Muhammad Abdullah Zaidel ba jaku iya sebedau pengerami nya madah, penyangkai ti bepelasarka integrasi enggau pemansang industri nya sebagi ari dua buah penyangkai kapal tasik dalam deka digaga nengah Pelin Pemansang Udah COVID-19 Sarawak (PCDS) 2030.

Ku iya, sebuah agi penyangkai kapal deka digaga iya nya ba utara Sarawak.

Penatai Premier Sarawak ba Penyangkai Kapal Antwerp-Bruges lalu diterangka enggau pengawa ke digaga ba penyangkai nya.

Udah nya iya bisi ngatur penemuai basa ngagai Menteri-Presiden Flanders bagi Flemish, Jan Jambon.

Bela nyempulang maya nya, Sapit Premier Sarawak, Datuk Amar Awang Tengah Ali Hasan, Sapit Menteri Infrastruktur enggau Pemansang Penyangkai Kapal, Datuk Majang Renggi enggau Duta Malaysia ke Belgium enggau Luxembourg, Dato’ Ahmad Rozian Abd Ghani. -EDISI UKAS

add comment