Perintah Sarawak Ngerumban Pengawa Ngaga Projek ALAF

HARI EMPAT, 28 JULAI 2022

KUCHING: Perintah Sarawak nengah Opis Menteri Utiliti enggau Telekomunikasyen Sarawak benung besaup enggau Sarawak Energy Berhad (SEB) ngerumban bejadika 40,000 peminta nyambung karan nengah projek Dana Permohonan Tambahan atau Lewat (ALAF).

Menteri ba opis menteri tu, Datuk Julaihi Narawi madah, tu dikena nentuka tiap buah rumah lebih agi ba menua pesisir bela ngasaika pemansang ari karan enda lama agi.

“ALAF siti projek betandu ke ditumbuhka Perintah Sarawak ba taun 2018 nyentuk ke diatu lalu lebih kurang 8,000 iti peminta udah tembu digaga.

“Bajet RM80 juta udah diungkupka ba taun 2018 lalu empai lama tu tadi RM150 juta agi dipinta alai semua penyampau agih belanja iya nya RM230 juta,” pia ku iya maya aum media udah Pengerami Nutup Woksop Ngatur Projek ALAF begulai enggau sida bekaul ba Palan Konvensyen Borneo Kuching (BCCK) ditu, kena Hari Tiga.

Sama bela datai iya nya Sapit Menteri Utiliti enggau Telekomunikasyen Sarawak, Datuk Dr Abdul Rahman Junaidi.

Taja pia, iya ngarapka penyampau pintu bilik ti minta projek nya endang amat.

“Nya alai, aku udah minta opis menteri, SEB tauka konsultan besaup enggau Opis Residen, Opis Pelilih Menua enggau Opis Pelilih Mit ngiga penerang tauka penyampau ke amat laban kitai ransing deka meda semua pintu bilik disambung karan,” ku iya madah baru.

Maya nya mega, Datuk Julaihi madahka diri nyungkung amat pengawa ngatur woksop nya ti nyadi pelasar berandauka penanggul ke bisi nyadi seraya berundingka chara bakani ngerumba sereta ngemuntang pengawa ngaduka ALAF lebih agi di menua pesisir.

Iya madah, sekeda ari pekara ke dirandau maya nya nyengkaum chara nambah sida ke ngembuan bepenau enggau pengelebih ulih ngaga projek ba raban kontraktor karan empu.

“Naka ke diatu bisi 20 kontraktor berejister enggau SEB enggau SESCO ti dibagi ngagai 30 raban lalu ngena 20 konsultan.

“Ketegal nya, kitai mesti nambahka pemayuh kontraktor ke dipilih ba tuju ngerumban projek ALAF tu,” pia ku iya.

Ba pekara bukai, Kaban Kunsil Nengeri (ADUN) Sebuyau nya madah, naka ke diatu penyampau bungkur pemansang karan di Sarawak udah manggai 98.6 peratus.-EDISI UKAS

add comment