Enam Buah Rumah Panjai DUN Bukit Saban Ngepunka Dulu Projek Nyukat Tanah NCR

HARI LIMA, 29 JULAI 2022

BUKIT SABAN: Enam buah rumah panjai di Paku Ulu ditu udah dipilih ngepunka dulu projek nyukat tanah Hak Adat Bumiputera (NCR) ba sitak Kunsil Nengeri (DUN) Bukit Saban.

Dulu ari nya, sebengkah randau diatur Sapit Premier Sarawak ke mega Kaban Kunsil Nengeri (ADUN) Bukit Saban, Datuk Amar Douglas Uggah Embas begulai enggau Opis Tanah enggau Servei (JTS) Sitak Betong bekaul enggau projek nya, kena Hari Empat tu tadi.

Randau nya diatur ba rumah panjai Danau Paku Spaoh ti bela netapka chara nyukat alai pengawa nya dikereja peranak rumah panjai empu ke udah belajar ari JTS kelimpah belajar ngena perengka GPS.

Projek nya diatur enggau chara berenggat berengkah ari enam buah rumah panjai nya sebedau bela dikereja ba semua genturung menua pegai DUN Bukit Saban.

Dipadahka mega maya randau nya, udah pengawa nyukat tembu digaga peranak rumah panjai, opis JTS deka nurun nentuka pengawa nya.

Tu dipeda ngelengkaska agi pengawa nyukat Tanah NCR ari Seksyen 6 ngagai Seksyen 18.

Kelimpah ari nya, tu sebagi ari chara ke datai ari buah penemu Datuk Amar Douglas Uggah. -EDISI UKAS

add comment