HARI SATU, 1 OGOS 2022
SELANGAU: Penyampau orang menua bukai nemuai ke Sarawak bisi nambah sepengudah perintah ngaga pemutus muka entara menua kena 1 April tu tadi.
Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, sebedau COVID-19 suba, penyampau temuai nemuai ngagai nengeri tu urung iya 4.5 juta iku setaun.
“Udah entara menua dibuka baru, kitai andal penyampau temuai ke Sarawak deka manggai 1.2 juta iku ungkup taun tu aja,” pia ku iya madah maya Pengerami Nutup Pesta Selangau 2022 ba Pasar Selangau, kena Hari Enam tu tadi.
Bela datai iya nya, Kaban Kunsil Nengeri (ADUN) Tamin, Ir. Christopher Gira, Senator Rita Sarimah Patrick Insol, Chairman Opis Kaunsil Menua Pesisir Sibu, Kaunselor Sempurai Petrus Ngelai sereta bala bukai.
Ba pekara bukai, Datuk Snowdan madahka opis menteri iya udah ngungkupka agih belanja RM76,000 dikena nyaup ngatur Selangau Rafting Challenge udah tu ila.
“Kelimpah ari nya, Ir. Christopher Gira mega bisi meri RM30,000 ngagai program tu lalu aku empu bela meri RM50,000 agi,” ku iya madah baru.
Pengerami lemai nya bela dirichah enggau Pekit Ratu Ngepan Iban Selangau Pegari 2022.
Gelar champion diempu Juliana Sudang Juing ditangkan Forleenarica Juana Juan ba penuduk lumur dua enggau penuduk lumur tiga diempu Claudia Anye.
Dulu ari nya, Ir. Christopher Gira bejadika pengerami nyuaka perais pekit berakit ke diatur ba Selangau Waterfront ke nyadi sebagi ari program beserimbai Pesta Selangau.
Gelar champian diempu Komiti Pemansang enggau Pengelikun Genturung Pendiau (JKKK) Rumah Eding lalu ditangkan UNIMAS GRT2 ba penuduk lumur dua enggau Nyaun Team ngempu penuduk lumur tiga.
Kategori Rakit Pemadu Manah diempu JKKK Rumah Jantang. -EDISI UKAS
