Tuai Genturung Pendiau, Tuai Rumah Dipinta Bejalaika Pengawa Enggau Manah

1 OGOS 2022

MURUM: Bala tuai genturung pendiau tauka tuai rumah ke dikeandal nampung pengawa sida ba Sebauh dipinta bejalaika pengawa diri enggau manah ketegal ngira pengelantang pengidup rayat enggau pemansang menua ke dipegai.

Jaku nya dibantai Kaban Kunsil Nengeri (ADUN) Murum, Kennedy Chukpai Ugon maya Pengerami Pemesai Begulai Enggau Rayat di Rumah Maren Uma Jeffery Sulau Lasah, Uma Pako, Sungai Pesu, Tubau, kena Hari Enam tu tadi.

Pengerami nya bela digulu Kaban Parlimen Ulu Rajang, Datuk Wilson Ugak Kumbong.

Berebak enggau nya, Kennedy ngenataika jaku pengaga ati ngagai sida ke dikeandal baru megai pengawa nyadi tuai genturung pendiau enggau tuai rumah kelimpah bisi mega ke baru dichiri.

Dulu ari nya iya mega dipebasa bejadika Gerempung Raban Bansa Ukit Belaga (PMUB) di Rumah Panjai Uma Ukit Apau Koyan, kena Hari Lima.

Sehari nya mega, pengari ari Sarawak Multimedia Authority (SMA) James Bungan, Danawa Resources enggau Pandolab bisi ngabas pemanah bungkur arus penyambung tauka internet enggau komunikasyen ba Sungai Asap/Koyan.-EDISI UKAS

add comment