Perintah Sarawak Ngena Belanja Diri Empu Ngadu Projek RADDA

HARI DUA, 2 OGOS 2022

SIBU: Perintah Sarawak deka ngena belanja diri empu ngaga projek nengah Ejensi Pemansang Delta Rajang (RADDA).

Sapit Menteri Pengatur Mengeri, Tanah enggau Rampa Menua Sarawak ke mega Chairman RADDA, Datu Len Talif Salleh madah, sida mega enda minta pemendar ari orang bukai ngaduka projek tang semua kaban komiti bela besetuju projek digaga.

“Projek tu digaga ari belanja perintah nengeri lalu ukai ari perintah besai.

“Nya alai, kitai enda ibuh minta pemendar ari orang bukai ngaga projek tu.

“Tu chara kami tauka ‘fast track’ ngaduka projek ungkup pengelantang rayat,” pia ku iya maya aum media Lab Ejensi Pemansang Delta Rajang ditu, kena Hari Satu.

Nimbal tanya bekaul penumbuh macham bengkah ejensi ba nengeri tu, Datu Len madah, Sarawak menua ke besai alai pengawa numbuhka ejensi nya chara ke engkeman dikena ngaduka pemansang.

Ku iya, RADDA deka ngemeratka pengawa nentuka program ke patut digaga ba sesebengkah kandang endur.

“Kami ba RADDA deka nentu, ngaduka pansik SWOT (pengering, pengelemi, awak enggau penguji) nama bagi pengering enggau pengelemi kami. Udah nya kami deka ngerintai pekara ke ditemu ari pengelemi ke udah dipansik nya.

“Nya alai, kitai numbuhka mayuh ejensi ngambika sesebengkah ejeni nya ulih beratika pekara bekaul pengering enggau pengelemi tauka pengurang ba menua ke dipegai,” ku iya nerang.

Nangkan nya, Sapit Menteri Pekara Korporat, Pemadah enggau UKAS ke mega Kaban Kunsil Nengeri (ADUN) Semop, Datuk Abdullah Saidol madah, RADDA megai pengawa ke besai ba tuju nyempilka agi seraka pemansang mengeri enggau menua pesisir.

Kelimpah ari nya ku iya, RADDA mega ngemeratka pengawa nyungkakka sosioekonomi ba tiap genturung pendiau.

“Kitai enda ulih ngena chara lama dikena ngaduka pemansang ba menua pesisir.

“Ketegal nya, diatu udah mayuh ejensi baka tu ditumbuhka.

“Pelaba aku nengeri bukai nadai ejensi baka tu ti megai pengawa nyempilka seraka pemansang mengeri enggau menua pesisir,” pia ku iya.

Bela datai maya nya, ADUN Pakan Tan Sri William Mawan Ikom, ADUN Meradong Datuk Ding Kuong Hiing enggau ADUN Meluan Roland Duat Jubin. – EDISI UKAS

add comment