Jelajah Aspirasi Keluarga Malaysia Renggat Sarawak Pelin Perintah Nyaup Rayat

HARI TIGA, 3 OGOS 2022

KUCHING: Jelajah Aspirasi Keluarga Malaysia ke deka diatur ba Dataran Perayaan ditu kena 5 Ogos 2022 nyadi siti ari pelin perintah nyaup rayat lebih agi bekunsika penerang bekaul bantu ke bisi ditumbuhka perintah.

Sapit Menteri ba Opis Premier Sarawak (Undang-undang, MA63 enggau Kaul Perintah Besai-Nengeri), Datuk Sharifah Hasidah Sayeed Aman Ghazali madah, program nya bela ngembuan tuju deka nyungkakka agi ulah beserakup rayat Malaysia.

“Sarawak nyadi nengeri ketujuh alai ngatur program tu alai kitai baka diri sebilik ba Malaysia patut mekuhka ulah beserakup, rindu begulai enggau pangan diri sereta ngemeranka ulah besaup.

“Nya alai ba aku, Jelajah Aspirasi Keluarga Malaysia tu endang manah diatur nyengkaum ba kitai di Sarawak ditu,” ku iya madah.

Iya madah munyi nya maya dirandau media udah bejadika Pengerami Nyuaka Pemeri Pakej Pelajar ngagai enam buah sekula ba Palan Servis N.7 Samariang, kena Hari Dua.

Sekula ke nerima pemeri tu iya nya Sekula Primeri (SK) En. Buyong, SK Gita, SK Astana, SK Agama Abdul Kadir Hasan, SK RPR Jalan Astana enggau SK Siol Kanan.-EDISI UKAS

add comment