Datuk Aaron Bejadika Pengerami Hari Bujang Berani Nengeri Sarawak Renggat Pelilih Kanowit

HARI LIMA, 5 OGOS 2022

KANOWIT: Pengerami Hari Bujang Berani Nengeri Sarawak renggat Pelilih Kanowit udah dipenyadika Sapit Menteri Pengerai II Malaysia, Datuk Aaron Ago Dagang ba Dataran Kubu Emma, empai lama tu tadi.

Datuk Aaron ke mega Kaban Parlimen Kanowit maya nya madah, dua taun sebedau tu, pengerami nya enda disambut baka selama ketegal betapi enggau pandemik COVID-19.

“Di Sarawak kitai bisi tiga iti tiang pengingat bujang berani iya nya di Kuching, Lundu enggau Kanowit.

“Tiap taun kena 31 Julai, Hari Bujang Berani disambut kitai ditu,” ku iya madah.

Iya mega madah, ukai semina dikena ngenang bujang berani suba tang pengerami nya deka meri pengeransing ngagai raban nyaga pengelikun ke agi gawa nyengkaum maya nyaup perintah ngemujur Atur Operasyen Standard (SOP) napi pandemik COVID-19.

Maya dirandau, Datuk Aaron bela ngenang penumbuh Rajang Area Security Command (RASCOM) ba taun 1972 suba.

Iya enggau nya madahka diri udah nganjung peminta beratika baru kandang endur nya ngambika ulih dikemansang lalu udah ngaga pelin gawa ti mega udah dikemendarka Premier Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg.

Ba pengerami nya, Chairman Komiti Pengatur ti ngarika Gerempung Veteran Soldadu Malaysia Sarawak (PVTMS) enggau Gerempung Ex-Polis Sitak Kanowit, Juat Jagok ngarapka mensia mayuh bela ngenang pemeras bala bujang berani suba ngulihka pengelikun menua baka diasaika maya hari tu.

“Semua pengelantang pengidup enggau pengelikun ke diasaika kitai diatu ukai muntang diulihka, semua nya ari pemerani bala bujang berani berambunka nyawa sida suba ngelaban penyelawai,” ku iya madah.

Bela datai maya nya Pegawai Pelilih Kanowit, Cassylia Benet, pengari Panglima Ke-31 Infantri, Leftenan Kolonel Shapirun Hashim, Tuai Polis Pelilih Kanowit DSP Tega Bilong enggau Presiden PVTMS Francis Yeo Wan Hui-EDISI UKAS

add comment