HARI ENAM, 6 OGOS 2022
KUCHING: Poliklinik Pengerai Raban Soldadu Malaysia (ATM) di Kem Penrissen keterubah iya digaga di Malaysia udah berengkah dibuka kena 5 Ogos 2022.
Menteri Kanan Pengetan Pengelikun, Datuk Seri Hishammuddin Tun Hussein madah, pengawa muka Poliklinik Pengerai ATM nya deka mai pemaik ngagai lebih 12,000 iku raban ATM, ruang bilik enggau veteran ATM di nengeri tu.
Ku iya, projek ke ditumbuh kena bulan November 2017 tu deka disikap enggau servis lutur pakar berubat enggau lutur pakar ngeli kelimpah pesakit luar enggau wad.
“Tu sebagi ari inisiatif Opis Menteri Pengetan Pengelikun begulai enggau ATM ngambika enda bepanggai ba sepital perintah di Kuching.
“Kelimpah ari nya, tu mega dikena nyungkakka ulah angkun raban soldadu bebendar ngetan pengelikun menua,” ku iya bejaku ba aum media udah pengawa bejadika Poliklinik Pengerai ATM Kem Penrissen, Kuching, kena Hari Lima.
Datuk Seri Hishammuddin nambahka jaku iya, isu pengintu pengelantang raban enggau veteran soldadu deka dikemeratka seagi iya nyadi Menteri Pengetan Pengelikun.
Berindik ari nya, ku iya, empat agi perengka guna pengerai deka digaga enda lama agi di Seberang Takir, Terengganu, Sungai Petani, Kedah, Kluang, Johor enggau Kuantan, Pahang udah pemujur Poliklinik Pengerai ATM di Kem Penrissen digaga.
Kelimpah ari nya, Datuk Seri Hishammuddin minta raban peribit enggau kompeni minyak enggau gas bela besaup enggau Opis Menteri Pengetan Pengelikun nyediaka perengka guna pengerai sereta meri perengka guna ke diguna ba poliklinik nya.
Bela datai, Tuai Sekretari Opis Menteri Pengetan Pengelikun, Datuk Seri Muez Abd Aziz, Panglima ATM, Jeneral Tan Sri Affendi Buang enggau Panglima Soldadu Darat, Tan Sri Zamrose Mohd Zain.-EDISI UKAS
