JHS Nyuaka Projek Kampung Rama Ngagai Peranak Rumah Manggat Meringgai

HARI TIGA, 10 OGOS 2022

LUBOK ANTU: Sida ari Rumah Manggat Meringgai nerima beberapa bengkah projek kampung rama ke digaga Opis Kampung Sarawak (JHS), kena Hari Satu.

Direktor JHS, Datu Hamden Mohammad madah, projek betikas tinggi tu ungkup pemansang rayat di menua pesisir.

“JHS deka terus nyaup rayat di menua pesisir lebih agi ke diau ba ‘Hutan Simpan Kekal’ ngambika ulih ngaga enggau ngemanahka projek kampung rama,” ku iya.

Iya madah munyi nya maya ngarika Sapit Menteri Pengatur Mengeri, Tanah enggau Rampa Menua Sarawak, Datu Len Talif Salleh maya bejadika pengawa nyuaka projek kampung rama di Rumah Manggat Meringgai.

Projek-projek kampung rama tu iya nya Pengawa Matau Komuniti ungkup Karnival Produk Kampung Ukai Kayu (NTFP); Program Komunikasyen, Pelajar enggau Penerang Mensia Mayuh (CEPA); Kus Betukang Kayu & Karan Di Rumah Manggat; Pengawa Ngaga Enggau Mini Ai Paip Graviti Di Rumah Manggat; Pengawa Ngemanahka Rumah Panjai Di Rumah Manggat; enggau Projek Ngaga Jeti Enggau ‘Floating Pontoon’ Di Ulu Sungai Menyang.

Ba program ke sebaka, Datu Hamden bela bejadika Sistem Tagang ke diatur JHS besaup enggau Sarawak Energy Berhad (SEB) serta Opis Betanam Betupi Sarawak (DOA) kelimpah beberapa projek ba rumah panjai nya baka Sistem Tagang – P17; ai beresi nengah projek ngaga sistem paip graviti; ngemanahka rumah panjai iya nya tangga, dinding ruai enggau tanju; 500 paung bemban sereta perengka guna ‘homestay’ baka bilik tinduk enggau bilik mandi.

Kelimpah ari nya, Datu Hamden mega ngabas beberapa sangkar enggau endur ngaga sistem tagang lalu ngemataka pengawa ngelepaska anak ikan ba dia.

Bela datai, Tuai Pelilih Kampung Rama JHS, Azahari Omar, Pegawai Kanan JHS ke bukai, Penghulu Kelinsing Mandau, pengari Sarawak Forestry Corporation, Abang Mulatib sereta pengari ari ejensi perintah enggau peribit. -EDISI

add comment