Kuching Nyadi Tuai Rumah Ngatur ‘Asian South Pacific Association of Sport Psychology International Congress’ ke-9

HARI TIGA, 10 OGOS 2022

KUCHING: Mengeri Kuching dipilih nyadi tuai rumah alai ngatur ‘Asian South Pacific Association of Sport Psychology International Congress’ (ASPASP) ke-9 taun tu.

Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, bisi 344 iku penyereta ari menua luar enggau ari menua tu empu ngambi bagi ba program nya ke diatur kena 9 nyentuk 11 Ogos tu.

Ku iya, program tu mega ulih dikena ngangkatka baru sektor dagang temuai udah napi penanggul ketegal pandemik COVID-19 dua taun ke udah.

“Program ke diatur tu tau nyungkak industri dagang temuai udah betapi enggau pengelekai COVID-19 dua taun ke udah,” ku iya.

Iya madah munyi nya maya bejadika ASPASP ke-9 di Palan Konvensyen Borneo Kuching (BCCK), kena Hari Dua.

Kelimpah ari nya, Dato Sri Abdul Karim madahka program nya bela ulih ngangkatka Sarawak nyadi endur ke ulih nyediaka mayuh bengkah program.

“Pekara tu mega ulih nyaup Sarawak nyadi palan ngatur mayuh bengkah program lebih agi ba pengawa lumba,” pia ku iya.

Dato Sri Abdul Karim nambahka jaku iya, pengawa bekaul enggau psikologi lumba batang pekara ke besai dikena meri peransang ngagai jurulatih enggau atlit di Sarawak. -EDISI UKAS

add comment