HARI TIGA, 7 SEPTEMBER 2022
KUCHING: Polisi enggau visi Sarawak bekaul enggau bekenaka kuasa gadung enggau beresi sebagi ari pekara ke tau matak pemeranak puku menua luar datai ngagai nengeri tu lebih agi ba pengawa ‘decarbonation’.
Maya ngenataika jaku terima kasih ngagai Konsortium Korea Selatan ti deka besaup enggau Sarawak ba pengawa ngemansutka hidrogen enggau ammonia, Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Perintah Sarawak deka nentuka saup enggau tiga industri besai Korea ngemansangka ekonomi hidrogen.
Iya bejaku munyi nya maya ngenataika jaku terima kasih ngagai pengatur pengawa pemadu tinggi posco, pengeluar besi pemadu besai korea ba indu opis konglomerat nya di seoul, korea selatan, kena hari dua.
Datuk Patinggi Tan Sri Abang Zohari madah, Sarawak betuah ketegal ngembuan pengaya kuasa ulih diganti baru baka kuasa hidro.
Premier Sarawak enggau raban bukai ngagai Indu Menua Korea Selatan kena Hari Minggu tu tadi, bela ngembuan tuju negutka kaul enggau industri Korea ba bidang kuasa gadung enggau inovasyen.
Berebak enggau nya, POSCO ngelanggur deka ngena hidrogen nyadi kuasa dikena sida ngaga besi ti datai ari menua bukai kelimpah Malaysia, lebih agi Sarawak.
Kelimpah ari nya, tiga buah kompeni Korea iya nya Samsung, Lotte enggau POSCO udah nyain sempekat pemereti ati (MOU) enggau Perintah Sarawak nengah Kaunsil Pemansang Ekonomi Sarawak (SEDC) dikena ngaga loji hidrogen ba baruh Projek H2biscus.
MOU nya disain bulan Januari tu tadi dikena ngasilka hidrogen enggau ammonia ba loji ke deka digaga di Bintulu.
Projek Hidrogen/Ammonia gadung H2biscus Sarawak deka ulih ngeluarka sepenyampau 630,000 tan metrik (mt) ammonia gadung, 600,000 mt ammonia biru, 460,000 mt methanol gadung enggau 7,000 mt hidrogen gadung.
Kena Hari Tiga, Premier Sarawak deka disempulang Mandal Menteri Kedua Opis Menteri Orang Dagang, Industri Enggau Kuasa Korea, Park Il-Jun ngemataka pengawa nyain MOU entara Sarawak Energy Berhad (SEB), SEDC enggau Konsortium Samsung-POSCO-Lotte.
Bela nyempulang Premier Sarawak iya nya, Sapit Menteri Kuasa Enggau Pengintu Rampa Menua Sarawak, Dr Hazland Abang Hipni, Sapit Sekretari Perintah Sarawak (Pengatur Ekonomi Enggau Pemansang), Datu Dr Muhammad Abdullah Zaidel, Chairman SEDC, Tan Sri Datuk Amar (Dr) Abdul Aziz Husain Enggau Tuai Pegawai Eksekutif Kumpulan SEB, Datu Sharbini Suhaili. -EDISI UKAS
