HARI DUA, 13 SEPTEMBER 2022
KUCHING: Tiap iku rayat ba nengeri tu dipinta bela ngambi bagi ba pengawa bekaul enggau sektor pemakai ke dipeda sebagi ari sektor ke ngembuan pengelebih dikemansangka agi.
Sapit Premier Sarawak, Datuk Amar Awang Tengah Ali Hasan madah, sektor nya semampai bisi peminta nyerumba pengidup mensia besehari-sari.
“Ba dunya tu mayuh sektor napi penanggul ketegal pandemik COVID-19 baka sektor kilang tang sektor pemakai semampai bisi.
“Nya alai, pekara tu patut dipeda tiap iku kitai lalu landik beambi ulih ari pengelebih ba pekara nya,” pia ku iya maya Pengerami Bejadika Aiman Mart ditu, kena Hari Dua.
Ba pekara bukai, iya ke mega Menteri Dagang Entarabansa, Industri enggau Pemeranak Puku Sarawak madah, Perintah Sarawak semampai ngemeratka pemansang Dagang Mit enggau Jelan Pemesai (PKS) ketegal nyadika pengering ngagai ekonomi Sarawak enggau menua tu.
“PKS ukai semina beguna ngagai rayat kitai ti ngemeranka pengawa dagang aja tang mega meri pengawa puang ke mayuh ngagai semua kitai.
“Nya alai, PKS semampai dikemeratka perintah menua tu,” ku iya madah baru.
Pengerami nya bela digulu Sapit Menteri Raban Nembiak enggau Pemansang Orang Dagang (Pemansang Orang Dagang), Dr Ripin Lamat sereta bala bukai. -EDISI UKAS
