HARI TIGA, 14 SEPTEMBER 2022

KUCHING: Gabungan Parti Sarawak (GPS) udah nyikap diri napi Pengawa Bepilih Besai (PRU-15) ke deka datai.

Chairman GPS ke mega Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, GPS bela ngemeranka atur lama ba pengawa beduaka penuduk parlimen enggi empat parti komponen sida.

Kelimpah ari nya, iya madahka Perintah Sarawak semampai chakah ngambi hak Sarawak baka ba Sempekat Malaysia 1963 (MA63) nengah aum kaunsil khas bekaul MA63.

“Agi bisi dua tiga iti pekara agi dirandau kitai bekaul enggau pengawa ngetanka hak Sabah enggau Sarawak ba MA63.

“Pia mega tu keterubah iya GPS bediri ba renggat menua ngena tikit parti di Sarawak iya nya GPS,” ku iya nerang.

Sama bela datai Sapit Premier Sarawak, Datuk Amar Douglas Uggah Embas enggau Datuk Amar Awang Tengah Ali Hasan sereta Sekretari Besai GPS, Dato Sri Alexander Nanta Linggi.

Kelimpah ari nya bala tuai parti komponen GPS mega bisi iya nya Presiden Parti Sa’ati Rayat Sarawak (SUPP), Dato Sri Dr. Sim Kui Hian, Presiden Parti Demokratik Progresif (PDP), Datuk Seri Tiong King Sing enggau Presiden Parti Rakyat Sarawak (PRS), Datuk Joseph Salang Gandum. -EDISI UKAS