HARI SATU, 26 SEPTEMBER 2022
KUCHING: Sarawak deka ngaga vaksin diri empu dikena napi penyakit berampit nyerumba penumbuh Pelin Pemansang Udah COVID-19 (PCDS) 2030.
Premier Sarawak, Datuk Patinggi Tan Sri Dr. Abang Abdul Rahman Zohari Tun Datuk Abang Openg madah, ketegal nya, Perintah Sarawak udah ngungkupka belanja RM200 juta dikena ngaga palan mansik.
Ku iya, ari ulah besaup palan pemansik serata dunya, dudi hai ila Sarawak ulih ngaga vaksin dikena napi penyakit pandemik.
“Kitai deka ngaga palan pemansik penyakit berampit tropika ke diatu benung digaga.
“Aku baru pulai ari Korea alai aku udah berandau enggau Samsung Biologic lalu sida besaup enggau Amerika Syarikat (FDA) ke ngaga ubat dikena ngubat nama-nama bansa penyakit.
“Lalu aku andal kitai ulih ngaduka pengawa tu ketegal ngira pengelikun pengerai rayat Sarawak,” ku iya madah maya bejadika Pengerami Beterima Kasih Begulai Enggau Raban Terabai Menua COVID-19 ke diatur ba Palan Konvensyen Borneo Kuching (BCCK) ditu, kena Hari Minggu.
Ba pekara bukai, iya mega madah, Perintah Gabungan Parti Sarawak (GPS) udah ngaduka chara dikena nyaup ngelempung tating belanja rayat nengah Bantu Khas Sarawakku Sayang (BKSS).
“Naka ke diatu kitai udah mansutka belanja RM6.7 bilion dikena ngemujurka BKSS 1.0 nyentuk 9.0,” ku iya madah baru.
Bekaul enggau PCDS 2030, Premier Sarawak madah, tuju pelin nya dikena mai rayat mansang bepelasarka data enggau inovasyen.
“Ba pekara ekonomi, Perintah Sarawak ngembuan juluk ati deka nambahka penatai ari RM136 bilion ngagai RM282 bilion manggai taun 2030 tauka niki 8.0 peratus setaun,” pia ku iya.
Bela datai maya pengerami nya, Sapit Premier Sarawak, Dato Sri Prof. Dr. Sim Kui Hian enggau bini Datin Sri Enn Ong Siok Ean, Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom enggau bini, Datin Sri Loreta Rundi, Sekretari Perintah Sarawak, Dato Sri Mohamad Abu Bakar Marzuki enggau bini, Datin Sri Baduyah Bujang, Sapit Menteri Kebun Dandang Besai enggau Komoditi I Malaysia Datuk Willie Mongin, Sapit Menteri Pengerai II Malaysia Datuk Ago Dagang @ Aaron Ago Dagang, Tuai Direktor Pengerai Tan Sri Dato’ Seri Dr. Noor Hisham Abdullah sereta temuai dipebasa ke bukai.-EDISI UKAS
