HARI EMPAT, 29 SEPTEMBER 2022

SARIKEI: Bisi 162 iku nerima 203 chek pampas tanah ke ditujah projek Jalai Merudu/Sungai Baji ditu enggau semua penyampau RM7,997,859.87.

Pengawa nyuaka pampas nya dipenyadika Sapit Premier Sarawak, Datuk Amar Awang Tengah Ali Hasan ke diatur ba Dewan Suarah Sarikei, kena Hari Tiga.

Bejaku ba pengawa nya, Datuk Amar Awang Tengah madahka Perintah Sarawak enda sepeneka ngambi tanah tang meri pampas enti tanah nya bisi ditujah projek lalu nitihka atur ba Kanun Tanah Negeri Bab 81 enggau Pekara 13 Konstitusyen Perintah Besai.

“Nadai undang-undang ngasuh ngambi tanah tauka ngena reta orang bukai sepeneka ati tauka nadai mayar pampas nitihka pematut.

“Semua tanah ke bisi ditengah projek dibayar pampas nitihka atur ari Opis Tanah enggau Servei,” pia ku iya madah.

Bekaul enggau pemansang, iya ke mega Menteri Pengeraja Asal enggau Pemansang Kandang Mengeri II madahka Perintah Sarawak semampai chakah nentuka nengeri tu ba singkang ke engkeman ngelawa tuju pemansang manggai taun 2030 bepelasarka Pelin Pemansang Udah COVID-19 2030 (PCDS 2030).

Ba pengawa nya, Kaban Kunsil Nengeri (ADUN) Repok, Dato’ Sri Huang Tiong Sii mega nerangka projek jalai 3.5 kilometer pemanjai nya ngenyantilka Jalai Meruton enggau Jalai Rentap.

“Tu deka ngemuntangka pejalai rayat lebih agi sida ke diau semak Jalai Repok, Jalai Hijau, Jalai Merudu/Meruton nyentuk Kampung Seberang,” ku iya madah.

Sama bela datai maya pengawa nya, Sapit Menteri Pengeraja Asal enggau Pemansang Mengeri, Datu Len Talif Salleh. -EDISI UKAS