HARI DUA, 5 OKTOBER 2022
SIBU: Perintah Sarawak semampai chakah deka nyungkak pekara pelajar enggau pemansang modal mensia di nengeri tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perintah nengeri nengah Opis Menteri Pelajar, Inovasyen Enggau Pemansang Pengelandik Sarawak udah nyediaka agih belanja dikena nyaup perintah besai ngemanahka infrastruktur enggau perengka guna di sekula.
Ketegal nya ku iya, bala pengajar patut nimbal pekara tu enggau pengeransing ngemansangka modal mensia.
“Nama ke bisi kurang kitai nambah. Ukai kitai deka nyadi ‘champion’ tang kitai nitihka peminta pemansang ekonomi dunya baru tu.
“Nya alai, perintah Sarawak nengah Opis Menteri Pelajar, kitai meri belanja. Abis nadai kitai ngemeranka pengelandik ba Bahasa Malaysia enggau Bahasa Inggeris,” pia ku iya maya Program Gempuru Pengatur Pelajar Prinsipal Sekula Sekondri Sarawak Ke-57 ditu, kena Hari Tiga.
Pengawa nya bela digulu Sekretari Perintah Sarawak, Dato Sri Mohamad Abu Bakar Marzuki, Sapit Menteri Pelajar Enggau Inovasyen Sarawak, Dr Annuar Rapaee, Direktor Opis Pelajar Sarawak, Datu Dr Azhar Ahmad sereta temuai ke bukai.
Nambahka jaku iya, Premier Sarawak mega minta bala prinsipal sekula di nengeri tu nempa tauka ngadaka modal mensia ngembuan pengelandik baru.
Ku iya, nengah pengelandik sida, modal mensia ke ditempa ulih nyaup nyungkakka ekonomi nengeri tu ngagai tikas ke tinggi agi.
“Bala pengajar, sehari tu aku madahka pekara tu laban penegap Sarawak dudi hari ba ekonomi baru endang begunaka pengelandik ke baru.
“Ketegal nya kitai nyungkakka ekonomi kitai ngambi ulih mansang ngagai ekonomi baru ke diulih ari pengelandik bala anak maya hari tu,” ku iya madah baru. -EDISI UKAS
