HARI TIGA, 12 OKTOBER 2022
BAKUN: Sarawak bela ngambi bagi ngulu Gempuru Pengatur Undang-undang COP27 Globe ke diatur di Mesir bulan November tu.
Sapit Menteri Kuasa enggau Pengelikun Rampa Menua Sarawak, Dr Hazland Abang Hipni madah, ari 198 buah menua ke nyadi raban COP27 ti ngasika Sempekat Paris, semina 119 buah aja ke bisi pelin ngurangka pemansut karbon nyentuk taun 2050.
“Ungkup Sarawak, kitai deka ngaduka dagang industri hidrogen.
“Kebuah pia laban hidrogen kitai bansa premium ti bepun ari hidro. Hidro nya jauh manah enti dibanding enggau hidogren ari menua bukai ke enda ngena kuasa hidro baka arang batu, nuklear tauka ke bukai. Tu pengelebih menua Sarawak,” pia ku iya madah.
Iya nerangka pekara nya maya dirandau udah ke ngulu Pengerami Ngenang Hari Kuasa Hidro Global ba Tekat Ai Bakun kena Hari Dua.
Berambaika jaku ‘Kita Boleh Dengan Tenaga Hidro’, pengerami nya diatur dikena mandangka pemanah ari kuasa hidro lebih agi enti dikemansangka enggau chara engkeman.
Bekaul enggau Hari Kuasa Hidro ke diintu keterubah iya seretai ba serata dunya taun tu, Dr Hazland madahka batang pekara dikemeranka Perintah Sarawak iya nya bekaul ubah gaya hari.
Ku iya, semina ngemeranka pengawa nyaga pemanah rampa menua ulih ngurangka penanggul ke nyadi ketegal ubah gaya hari.
“Chara tu mayuh, nyengkaum begunaka kuasa ulih dikena baru baka kuasa hidro.
“Kitai bisi sungai ke besai, suah ujan kelimpah bisi teknologi alai kitai dipebasa orang menua bukai,” ku iya madah baru.
Pengawa sehari nya bela digulu Tuai Pegawai Eksekutif Kumpulan Sarawak Energy (SEB), Datu Sharbini Suhaili, Tuai Pegawai Eksekutif SEB, Ir Bunyak Lunyong, Mandal Presiden Kanan bagi Pekara Pengerai, Pengelikun enggau Rampa Menua, Marconi Madai, Mandal Presiden Hydro, Ir Polycarp Wong enggau Menijer Stesyen HEP Bakun Jonny Wong.-EDISI UKAS
