HARI EMPAT, 13 OKTOBER 2022
KUCHING: Perintah Sarawak nengah Unit Pekara Pengarap Bukai (UNIFOR) udah ngagihka belanja sepenyampau RM24.643 juta ungkup 86 projek ba baruh geran renggat 1 taun tu.
Sapit Premier Sarawak, Datuk Amar Douglas Uggah Embas madah, projek tu nyengkaum pengawa ngaga, ngaduka baru enggau ngemanahka rumah sembiyang, dewan serbaguna sereta perengka guna ke bukai.
“Perintah Sarawak bela ngemendarka RM50 juta taun tu dikena nandu pengawa numbuhka UNIFOR di Sarawak,” ku iya.
Iya bejaku munyi nya udah nyuaka chek ungkup 76 projek sepenyampau RM19 juta di Kuching, kena Hari Empat.
Pengari penerima chek iya nya Sapit Premier Sarawak, Dato Sri Dr Sim Kui Hian, Menteri Pelajar, Inovasyen Enggau Pemansang Pengelandik, Datuk Roland Sagah Wee Inn, Sapit Menteri Ba Opis Premier Sarawak (Undang-Undang, MA63 Enggau Kaul Sarawak-Perintah Besai), Datuk Sharifah Hasidah Sayeed Aman Ghazali, Sapit Menteri Nembiak, Lumba Enggau Pemansang Orang Dagang, Dato Gerald Rentap Jabu, Sapit Menteri Pengerai Mensia Mayuh, Pengawa Berumah Enggau Kaunsil Kandang Menua Sarawak, Datuk Dr Penguang Manggil.
Datuk Amar Douglas Uggah mega madah, pengawa nyuaka chek nya mandangka UNIFOR mengkang ulih nyaup semua pengarap ukai Islam di nengeri tu.
Iya mega ngelalau gerempung ke diberi geran mansik enggau silik projek ke digaga ungkup sida.
“Tu dikena nentuka tiap projek digaga enggau manah lalu tembu nitihka atur ke udah ditetap kelimpah mai pemaik ngagai semua,” pia ku iya lalu madahka geran nangkan ke tu ila dipelabaka deka diberi ujung taun tu. -EDISI UKAS
