HARI DUA, 18 OKTOBER 2022

KUCHING: Kempen Tribe Legacy Sarawak diatur Business Event Sarawak (BESarawak) mujur bulih RM385.5 juta ungkup ekonomi nengeri tu.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, pengawa nya bela udah meri 30,594 pengawa puang ngagai rayat Sarawak ari macham bengkah program diatur kelimpah matak 145 program dagang dalam kandang dua taun tu.

“Tribe Legacy Sarawak tu nyerumba penumbuh Pelin Pemansang Udah COVID-19 (PCDS) 2030 ti nyadi sebagi ari chara ngemujur pelin perintah ke deka nyadi nengeri mansang, bepenatai pemisi besai manggai taun 2030.

“Ba aku, perintah enda ulih ngemujurka juluk ati enti nadai saup ari bala bukai baka pengatur program dagang, gerempung, sektor perintah enggau raban media,” pia ku iya madah maya kimpin dagang ‘Tribe Gathering Kuching’ 2022 ke diatur BESarawak ba Palan Konvensyen Borneo Kuching (BCCK) ditu, kena Hari Satu.

Nambahka jaku iya, Dato Sri Abdul Karim mega madah, siti program ari kimpin ‘Tribe Legacy Sarawak’ iya nya bejadika program tanggungpengawa rama korporat (CSR) ti minta pengatur program dagang meri bup ba tuju nyaup ngemuntangka pengawa belajar lebih agi di menua pesisir.

“Pekara tu patut diasaika semua begulai enggau perintah Sarawak nyukung semua pengawa ke diatur dikena ngemujurka program nya.

“Ketegal tu mega, opis menteri aku bisi meri 500 iti bup ngagai inisiatif ‘Books Build Legacy’,” ku iya madah baru.

Iya mega madah, nyadi subsektor ngemujurka langgur PCDS 2030, kaul nya mai Sarawak nyadi menua ke dipilih alai ngatur program dagang enggau dagang temuai ba ASEAN.

Bela datai maya nya, Sapit Menteri Dagang Temuai, Industri Kreatif enggau Seni Pemerindang Sarawak, Datuk Sebastian Ting Chiew Yew sereta temuai dipebasa ke bukai. -EDISI UKAS