HARI LIMA, 4 NOVEMBER 2022

BINTULU: Perintah Sarawak chakah majakka pengawa ngemanahka perengkaguna infrastruktur di Palan Industri Samalaju ba tuju matak mayuh agi pemeranak puku.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tebal agi pemeranak puku tekait ati enggau pengulih menua tu ngasilka produk baka ‘steel’, hidrogen enggau komponen bateri perengka pengangkut karan (EV).

“Ketegal nya, Perintah Sarawak nengah Opis Pemansang Bintulu (BDA), Sarawak Energy Berhad (SEB), LAKU enggau ke bukai mansutka belanja bilion ringgit dikena ngaga jalai alun, palan ngubat ai enggau ke bukai dikena nentuka palan industri nya ulih tetapika pengelantang pemeranak puku,” pia ku iya madah.

Iya madahka pekara nya nengah teks ke dibacha Sapit Premier Sarawak, Datuk Amar Awang Tengah Ali Hasan maya Pengerami Nasih Tanah Projek ECH ba Palan Industri Samalaju ditu, empai lama tu tadi.

Nambahka jaku iya, Premier Sarawak mega madah, dikena nimbal peminta ke majak mayuh dia, Opis Pemansang Koridor Kandang Menua (RECODA) udah ngaga dua iti projek ngemanahka infrastruktur iya nya nambahka penyampau ai ari 80 Juta Liter Sehari (JLH) ngagai 200 JLH manggai taun 2025 kelimpah ngemanahka jalai nebing tasik nyadi dua begembar.

“Enggau peminta ke majak nambah, perengkaguna ba palan tu patut dikemanahka agi.

“Kelimpah ari nya, Perintah Sarawak mega benung ngaduka 1,000 ekar pemesai kandang endur ba Palan Industri Samalaju ti diungkupka ngagai pengawa bekaul dagang mit enggau jelan pemesai (PKS),” ku iya madah baru.

Bela datai maya nya, Sapit Menteri Dagang Entarabansa, Industri enggau Pemeranak Puku Sarawak, Datuk Malcom Mussen Lamoh, Kaban Kunsil Nengeri (ADUN) Samalaju Dato Majang Renggi, Chairman OCI Company Lth Baik Woo Sock enggau Chairman Kumho Petrochemical Group Park Changgoo.-EDISI UKAS