HARI ENAM, 5 NOVEMBER 2022

KOTA SAMARAHAN: Chalun Gabungan Parti Sarawak (GPS), Datuk Rubiah Wang deka ngelaban chalun Pakatan Harapan (PH) Abang Abdul Halil Abang Naili ba penuduk Parlimen Kota Samarahan maya Pengawa Bepilih Besai Ke-15 (PRU-15) tu.

Nama seduai dipadahka Pengatur Pengawa Bepilih Besai Kota Samarahan, Annuar Da’an pukul 11 pagi ba Palan Ngantung Nama ke diatur di Dewan Suarah Kota Samarahan.

Sebedau nya, Datuk Rubiah datai ba palan nya pukul 8.40 pagi disempulang pemantai nama enggau penyukung iya.

Bela bisi datai meri sukung maya nya Menteri Dagang Temuai, Industri Kreatif enggau Seni Pemerindang, Sarawak ke mega Kaban Kunsil Nengeri (ADUN) Asajaya, Dato Sri Abdul Karim Rahman Hamzah sereta beratus iku penyukung ke bukai.

Chalun PH, Abang Abdul Halil datai dia pukul 8.41 pagi.

Parlimen Kota Samarahan bisi 82,229 pengundi lalu ari penyampau nya 41,638 tauka 50.6 peratus pengundi lelaki enggau 40,591 tauka 49.3 peratus pengundi indu. -EDISI UKAS