HARI ENAM, 5 NOVEMBER 2022

KUCHING: Chairman Gabungan Parti Sarawak (GPS) ke mega Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngarapka pengawa bejalaika kimpin Pengawa Bepilih Besai Ke-15 (PRU-15) diatur enggau mujur.

Ku iya, udah ke ngabas beberapa bengkah palan ngantung nama, iya meda semua penuduk Parlimen mandangka penyampau chalun ke enda sebaka.

“Aku meda bisi parlimen nya dua iku chalun, tiga tauka empat iku chalun bediri.

“Atur demokrasi menua kitai meri awak ngagai rayat milih sapa chalun ke ulih mai pengelantang sereta negika hak kitai baka ba Sempekat Malaysia 1963 (MA63),” pia ku iya madah.

Iya bejaku munyi nya ngagai media ba Palan Ngantung Nama di Sekula Sekondri (SMK) Petra Jaya ditu, Hari Enam.

Nambahka jaku iya, Premier Sarawak mega ngarapka Perintah Besai deka nyadi perintah ti entap lalu mai pengelantang ngagai rayat.

“Empat taun kitai bebuaika jam ketegal politik ti enda entap.

“Enti nunda kitai meri servis ke manah ngagai rayat lebih agi taun 2023 nyentuk 2024 dipelabaka macham penguji deka nyadi ba pekara ekonomi.

“Tang taja pia, GPS deka ngemeratka pengelantang Sarawak nengah kerejasama begulai enggau Perintah Besai,” ku iya madah baru. -EDISI UKAS