Ex-Chalun PSB Besemaya Nyukung GPS Di Saratok

HARI EMPAT, 10 NOVEMBER 2022

NYABOR: Ex-chalun Parti Sarawak Bersatu (PSB) Kabong, Wan Madehi Wan Ali enggau bala penyukung iya madahka diri meri sukung ngagai chalun Gabungan Parti Sarawak (GPS) di Parlimen Saratok, Giendam Jonathan Tait.

Maya Pengerami Pemesai Begulai Enggau Rayat ke diatur ba Dewan Lakin empai lama, lebih 700 iku bala mayuh nyambut penatai Giendam.

Ba penemu Kaban Kunsil Nengeri (ADUN) Kabong, Mohd Chee Kadir, udah maya iya rayat begempung penemu nentuka chalun GPS mujur ba Pengawa Bepilih Besai Ke-15 (PRU-15) tu.

“Kitai begunaka bala tuai ti ulih mai pemansang ngagai menua kitai.

“Nya alai, ngarapka rayat semua meri sukung ke tegap ngagai chalun GPS ba Parlimen Saratok,” pia ku iya madah.

Pengerami nya bela digulu Presiden Parti Demokratik Progresif (PDP), Datuk Sri Tiong King Sing.

Ba jaku iya Datuk Sri Tiong terang madahka GPS parti ti entap penemu sereta ngamatka semaya.

“Pengundi ditu anang mudah alah enggau jaku achuk orang lebih agi parti ari menua bukai,” ku iya madah.

Pengerami sehari nya bela digulu ADUN Marudi Datuk Penguang Manggil, ADUN Kalaka Muhamad Duri, ADUN Krian, Friday Belik enggau Senator Paul Igai.-EDISI UKAS

add comment