HARI EMPAT, 11 NOVEMBER 2022

KANOWIT: Rayat ba Parlimen Kanowit ditangkan landik milih pengari rayat alai sida patut nyukung Gabungan Parti Sarawak (GPS) ke ditemu ulih ngemansangka menua pesisir.

Ba pekara tu, chalun GPS ba Parlimen Kanowit, Datuk Aaron Ago Dagang madah, perintah GPS mega enda kelalu bepanggai ba pengawa ngiga belanja ari Perintah Besai.

Iya ke mega Sapit Menteri Pengerai II terang madahka chalun penyakal tauka chalun ngatika diri semina ngira diri tang ukai bebendar ngarika pengidup rayat Kanowit.

Iya madah munyi nya maya program Randau Ruai Begulai enggau Chalun GPS Parlimen Kanowit di Rumah Belayong, Nanga Dap enggau Rumah Tingai, Ulu Pidai, kena Hari Tiga tu tadi.

Datuk Aaron mega madah, penyakal semina ulih dipeda maya pengawa bepilih aja tang udah nya sida nadai ngayanka diri agi.

“Nya alai, ari sukung kita ngagai GPS, jaku enggau penemu Sarawak deka terang agi didinga ba Dewan Rakyat,” ku iya madah baru.-EDISI UKAS