HARI EMPAT, 17 NOVEMBER 2022

JULAU: Pemansang di Julau terus disungkakka nengah agih belanja ke udah dikemendarka perintah Sarawak sepenyampau RM74 juta ungkup projek ai beresi.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perintah Sarawak sedar rayat di Julau udah lama nganti projek nya ari perintah besai.

Ku iya, perintah Sarawak diatu enda ulih nganti agi sereta bepanggai ba Opis Menteri Pemansang Menua Pesisir (KPLB) bekaul enggau projek nya.

“Perintah Sarawak deka ngaga projek ai beresi ke beungkus RM74 juta. Aku berani ngemendar laban kitai bisi agih belanja.

“Kitai enda ulih bepanggai ba KPLB, aku nemu projek tu lama, rayat udah lama nganti,” ku iya ba Program Pemesai Begulai enggau Rayat di Julau, kena Hari Empat.

Premier Sarawak mega madah, pemansang pasar Julau terus disungkak nengah projek ngaga dewan ke beungkus RM15 juta kelimpah projek Waterfront Julau.

Ku iya, projek ngaga stesyen minyak mega mai reti ke besai ngagai rayat dia.

“Kitai nemu orang Julau, Pakan enggau Meluan, penatai pemisi sida majak nambah ukai smeina ketegal lada, tang ekonomi nengeri kitai udah majak manah.

“Nya alai kitai deka ngaga stesyen minyak di Julau ke deka digaga nengah SEDC Energy,” ku iya madah.

Bela datai, Sapit Menteri Pengatur Mengeri, Tanah Enggau Rampa Menua, Datuk Len Talif Salleh, Sapit Sekretari Perintah Sarawak (Pengatur Ekonomi Enggau Pemansang), Datu Dr Muhammad Abdullah Zaidel, Kaban Kunsil Nengeri (ADUN) Meluan, Rolland Duat Jubin, ADUN Meradong, Datuk Ding Kuong Hiing, ADUN Ngemah, Anyi Jana, ADUN Pakan, Tan Sri Dato Sri William Mawan Ikom Enggau Chalun Gabungan Parti Sarawak (GPS) Parlimen Julau, Datuk Joseph Salang Gandum sereta ke bukai. -EDISI UKAS