Bajet Sarawak 2023 Dikeringka Lima Prinsip, 11 Pelin Besai

HARI SATU, 21 NOVEMBER 2022

KUCHING: Bajet Sarawak 2023 ke ngena rambai jaku ‘Sarawak didahulukan ke arah masyarakat yang inklusif, makmur dan harmoni’ ditengkebang ngena lima prinsip enggau 11 pelin besai.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, lima prinsip tu iya nya ngemansangka ekonomi ti tegap, nempa Sarawak nyadi nengeri ke ulih besemekih sereta puh, nempa pengelandik rayat ti disukung teknologi digital bepenemu sereta ngemeran inovasyen enggau mai rayat beserakup nyengkaum ngelanggur penegap fiskal.

Iya madah, penegap fiskal lebih agi bekaul enggau pelin perintah Sarawak ngatur utang enggau chara ke engkeman, ngurangka defisit ti bepun ari belanja ke dipansut ketegal COVID-19 nyengkaum nyungkakka baru ekonomi.

Iya madahka pekara nya maya bejuraika Rang Undang-undang Bajet Sarawak 2023 ba Aum Kunsil Nengeri (DUN) Sarawak Ke-19 ditu, kena Hari Satu.

Nambahka jaku iya, iya madah 11, pelin besai ke langkar iya nya seririh enggau tuju penumbuh Pelin Pemansang Udah COVID 2030 (PCDS 2030) ti ngembuan tuju mai ekonomi Sarawak ngerembai enggau jampat sereta ngerumban pemansang.

“Sebelas batang pelin tu iya nya nempa pengelantang ekonomi, meransang pengerembai ekonomi, meransang pemeranak puku enggau pemansang dagang, nyungkakka ekonomi Sarawak ngambika ulih besemekih enggau ngemansangka modal mensia.

“Pelin besai tu mega mungkur langgur ngerumban pengawa bekenaka digital enggau data, nyebelaka penumbuh ekonomi enggau pengelikun rampa menua, ngenegapka pengelantang mensia mayuh, nyungkakka main asal, lumba enggau pemansang raban nembiak, ngelakuka pengawa mansik, pemansang, sains enggau teknologi sereta inovasyen enggau nyungkakka kapasiti perintah nengeri enggau pemanah meri servis,” pia ku iya madah.

Nya alai iya madah, pelin mulaika pemansang ekonomi Sarawak ba bajet 2023 deka lebih agi ngemeratka pengawa ngerumban pemansang ekonomi, ngenegapka chara mulaika pemanah, meransang pemeranak puku kompeni peribit, nempa pengawa puang enggau dagang sereta nempa ulah besemekih enggau penatai pemisi ke tinggi agi.

Dulu ari nya, Menteri Wang enggau Ekonomi baru nya mantaika bajet Sarawak enggau penyampau RM11.035 ungkup taun 2023.-Edisi UKAS

add comment