Lima Projek Tiang Telekomunikasyen Digaga Di DUN Simunjan

HARI DUA, 22 NOVEMBER 2022

KUCHING: Bisi lima iti tiang telekomunikasyen deka enggau udah digaga nengah Sarawak Multimedia Authority Rural Telecomunication (SMART) Renggat 1 enggau 2 ba sitak Kunsil Nengeri (DUN) Simunjan.

Sapit Menteri Utiliti enggau Telekomunikasyen I (Pekara Telekomunikasyen), Datuk Liwan Lagang madah, siti tiang nya udah dikena ba Kampung Senageh lalu tiga iti agi benung digaga kelimpah siti digaga nengah projek SMART Renggat 2 ke disadang tembu suku keempat taun 2023.

“Ba DUN Simunjan, nengah projek Sarawak Multimedia Authority Rural Telecomunication (SMART) Renggat 1 ari program Sarawak Linking Urban, Rural and Nation (SALURAN), siti tiang udah ulih dikena ba Kampung Senageh lalu dua buah agi ba Kampung Tanjung Pisang enggau Kampung Selingking ti deka ulih dikena ujung taun tu.

“Lalu siti agi ulih dikena ba suku keterubah taun 2023. Kelimpah ari nya, siti agi digaga nengah Prpjek SMART Renggat 2 ke digaga di Kampung Temiang ti dipelabaka ulih dikena ba suku keempat taun 2023,” ku iya nerang.

Iya bejaku munyi nya maya nimbal tanya Kaban Kunsil Nengeri (ADUN) Simunjan Awla Dris ba Aum Kunsil Nengeri (DUN) Sarawak Ke-19, kena Hari Dua.

Nambahka jaku iya, Datuk Liwan mega madah bisi empat iti tiang ke endang udah digaga deka meri servis arus penyambung nengah inisiatif Sarawak Rural Broadband Network (MySRBN).

Ku iya, tiga iti agi endur mega udah ngena tiang nya kelimpah Kampung Rangawan, Kampung Hijrah, Tanjung Harapan enggau pasar Simunjan ulih ngena perengkaguna nya ujung taun tu.

Bekaul enggau pengawa ke digaga Perintah Besai, ku iya, bisi 22 iti sitsem penabur deka dikemanahka agi.

“Perintah Besai udah ngelanggur beberapa bengkah inisiatif dikena ngemanahka tikas sereta bungkur sistem telekomunikasyen ba DUN Simunjan iya nya ngemanahka 22 buah stesyen pemanchar ari servis 3G/4G, 20 buah stesyen pemanchar ke udah tembu enggau dua buah stesyen ke benung digaga sereta disadang tembu ujung taun tu.-EDISI UKAS

add comment