Perintah Sarawak Ngungkupka Belanja RM509 Juta Ba Projek Betanam Betupi 2030

HARI TIGA, 23 NOVEMBER 2022

KUCHING: Perintah Sarawak ngungkupka agih RM509 juta dikena ngaduka macham projek betanam betupi manggai taun 2023.

Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail madah, pemutus nya dikena ngamatka tuju ngemerankan pengawa agropemakai di nengeri tu.

Kelimpah ari nya, iya mega madahka perintah semampai nyungkakka sektor peribit nengah model dagang Pubric-Private and Community Partnership (PPCP).

Ketegal nya, ku iya, perintah deka nyungkakka pengawa mansik, pemansang enggau inovasyen, bekenaka teknologi baru enggau digital.

Iya nerangka pekara nya dikena nimbal tanya Kaban Kunsil Nengeri (ADUN) Meluan, Rolland Duat Jubin maya Aum Kunsil Nengeri (DUN) Ke-19 ditu, kena Hari Tiga.

Kelimpah ari nya, iya madahka Sarawak napi defisit dalam kandang lima taun ke udah ba penyampau 29.8 peratus.

“Ba taun 2017, penyampau eksport bisi RM1.02 billion enti dibanding enggau import RM4.61 billion ti ngujungka defisit RM3.59 billion.

“Lalu ba taun 2021, penyampau eksport bisi RM1.11 bilion enti alai import M5.77 billion ti ngujungka defisit RM4.66 billion,” ku iya madah.

Nya alai, ku iya, Perintah Sarawak ransing deka meda pengawa betanam betupi dikemeratka ba Pelin Pemansang Udah COVID-19 (PCDS) 2030 alai Sarawak ulih nyadi menua eksport pemakai manggai taun 2030. -EDISI UKAS

add comment